Mereke kúnderi Jambyl oblysynda 5 egiz dúnıege keldi

TARAZ. QazAqparat – Aǵymdaǵy jyldyń 16,17 jeltoqsan kúnderi Jambyl oblysy boıynsha 144 sábı dúnıege kelse, onyń beseýi (10 sábı) egiz. Sonyń ishinde Taraz qalasynda mereke kúnderi 89 sábı dúnıege kelgen bolatyn, - dep habarlaıdy QazAqparat tilshisi.

QR Táýelsizdiginiń 30 jyldyǵyna oraı olardyń analaryna «Súıinshi» atty estelik bebı-bokstar tabys etildi.

«Súıinshi» syıqorabyna bóbekterge qajetti zattardan basqa QR Prezıdenti Qasym-Jomart Toqaevtyń quttyqtaý tilegi jazylǵan Ashyq hat, «Táýelsiz Qazaqstanǵa 30 jyl» monetasy men balanyń týýy týraly kýáligi salynǵan.

«Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!», - dep jazylǵan Prezıdenttiń quttyqtaýynda.

«Bizdiń qyzmetkerler 16, 17, 18 jeltoqsan kúnderi jumys istedi jáne AHAJ ókilderimen birlesip árbir sábı ómirinde óziniń alǵashqy qujatyn alýy úshin perzenthanalarda qujattardy qabyldady.

«Súıinshi» aktsııasyn oryndaý maqsatynda týý týraly kýálikterdi daıyndaǵany úshin AHAJ, bebı-bokstardy jetkizgeni úshin «Qazposhta» qyzmetkerlerine jáne perzenthanalarda jumys atqaryp otyrǵan dárigerlerge olardyń qajyrly eńbegi úshin alǵys aıtqym keledi», - dedi «Azamattarǵa arnalǵan úkimet» memlekettik korporatsııasy Jambyl oblysy boıynsha fılıal dırektory Qystaýbaı Saǵyntaev.