Merdigerler jol sapasyna qansha jyl kepildik berýge nıetti – Kólik mınıstrligi jaýaby
«Qazirgi tańda ortasha jóndeý jumystary tas joldyń betki qabatyn aýystyrý nemese qaıta jabý bolsa, kúrdeli jóndeý – tas joldyń negizimen, ıaǵnı astyńǵy qabatymen birge aýystyrý jumystary. Jol tósemderi men jabyndardy jóndeý arasyndaǵy qyzmet merzimi qoldanystaǵy normatıvtık-tehnıkalyq qujattarǵa sáıkes anyqtalady. Osylaısha, búgingi kúni ortasha jóndeý boıynsha jóndeý arasyndaǵy qyzmet merzimi salynǵan jabyn qabatyna baılanysty 2 jyldan 6 jylǵa deıin jáne kúrdeli jóndeý úshin 6 jyldan 18 jylǵa deıin ózgeredi», - dep atap ótedi mınıstrlik agenttiktiń saýalyna bergen jaýabynda.
Vedomstvonyń atap ótýinshe, merdiger jol qurylysyn aıaqtap, tapsyrys berýshi jumystardy qabyldaǵannan soń, tapsyrys berýshi men merdigerdiń arasynda jasalǵan kelisim shartqa baılanysty keminde 2 jyl kepildik merzimi taǵaıyndalady. Kepil merziminde merdiger anyqtalǵan aqaýlardy joıý boıynsha jumystardy keshiktirse, tapsyrys berýshi sotqa shaǵym túsiredi. Buǵan qosa, kepildik merzimi aıaqtalýǵa jaqyn ýaqytta kemshilikter men aqaýlar anyqtalsa, tapsyrys berýshi kepildik merzimin taǵy da 2 jyl merzimge uzartýǵa quqyly.
«Qazirgi tańda jol qurylysyn salýǵa arnalǵan jobalyq-smetalyq qujattamanyń durys jasalýyna qaraı merdigerler keminde 3 jyl ýaqyt merzimine kepil berýge nıetti»,- dep naqtylaıdy mınıstrlikten.