Merdiger kompanııalar ózi salǵan joldy 7 jyl boıy kútip ustaýǵa mindetteledi

<p>ASTANA. KAZINFORM — Kólik mınıstri Marat Qarabaev Úkimet otyrysynda jol jobalaryna tartylǵan kompanııalardyń jaýapkershiligin arttyrýdyń jańa tásili engiziletinin aıtty.</p>

«Sońǵy jyldardaǵy jobalardy iske asyrý tájirıbesin eskere otyryp, merdigerlerdiń, jobalaýshylardyń jaýapkershiligin arttyrý maqsatynda osy jobalarda halyqaralyq qarjy uıymdarynyń qoldaýymen EPCM kelisimsharty jáne FIDIC qaǵıdasy engizilýde. Ondaǵy sharttarǵa sáıkes merdiger kompanııa ózi jobalap, ózi salyp, 7 jylǵa deıin kútip ustaıdy», — dedi ol.

Mınıstrdiń sózinshe, bul tásil jobalaý men qurylys sapasynyń táýekelderin azaıtady. 

Vedomstvo jobalarǵa jergilikti kompanııalardy tartý úshin mynandaı sharalardy usynyp otyr:

— qazaqstandyq kompanııalardyń qatysýymen qurylǵan konsortsıýmdarǵa jeńildik berý;
— tehnıkasy Qazaqstanda shoǵyrlanǵan kompanııalarǵa ústemdik berý;
— qurylys jumystaryn júrgizýge qazaqstandyq lıtsenzııa bolý sharty;
— banktik kepildemeler bergende qazaqstandyq bankterdiń qarymta-kepildikteriniń bolýy.

«Ol usynystar halyqaralyq qarjy ınstıtýttarynyń qoldaýyn taýyp, konkýrstardyń negizgi talaby retinde bekitilýde. Bul degenimiz jergilikti kompanııalardyń áleýetin, tájirıbesin arttyryp, aldaǵy ýaqytta halyqaralyq qurylys kompanııalarymen básekeles bolýǵa múmkindik beredi», — dedi Marat Qarabaev.