Menıngıtten balasy men kelinin joǵaltqan otbasynyń taǵy bir múshesi aýrýhanaǵa tústi

ALMATY. QazAqparat - Almatyda menıngıtten balasy men bolashaq kelininen aırylǵan otbasynda taǵy bir adam menıngokokk juqpasyna kúdikpen aýrýǵana tústi, dep habarlaıdy QazAqparat tilshisi.

Almatylyq kelinshek Aıda Ahmetovanyń aıtýynsha, onyń inisi tamaǵy aýyryp aýrýhanaǵa túsken.

«Biz barlyǵymyz dárigerdiń baqylaýyndamyz. Іnim aýrýhanaǵa tústi. Oǵan dıagnoz qoıyldy - «menıngokokk juqpasynyń «A» toby. Aýrýhanada jatqanyna 2 kún boldy. Qyzýy joq. Jaǵdaıy jaqsy. Dárigerler taǵy qosymsha taldaýlar jasap jatyr», - dedi Aıda Ahmetova.

Qalalyq Densaýlyq saqtaý basqarmasynan habarlaǵandaı, jigitke «menıngokokkty nazofarıngıt» dıagnozy qoıylǵan. Alaıda, bakterııa áli qanǵa ótpegen. Dárigerler onyń aldyn alý úshin profılaktıkalyq sharalardy bastap ketti.

3 maýsym kúni menıngokokk juqpasynan kóz jumǵan 27 jastaǵy órt sóndirýshi Oljas Súleımenovtyń aǵasy Erbolat Súleımenovtyń dıagnozy áli belgisiz. Erbolat 5 maýsymda ózin jaısyz sezingen soń aýrýhanaǵa kelgen.

«Basym aınalyp, álsiregen soń aýrýhanaǵa ózim keldim. Qan tapsyrdym, jaqpa aldy. Dárigerler bári taza dedi. Biraq sonda da antıbıotık terapııasyn qabyldap jatyrmyn», - dedi Erbolat Súleımenov. 

Búgingi tańda respýblıka boıynsha 59 adam menıngokokk juqpasyn juqtyrǵan. Respýblıka boıynsha menıngokokk juqpasynan 13 adam kóz jumdy.

Almatyda 5 adam qaıtys boldy. Olardyń ekeýi - 5 jasqa deıingi balalar. Eki balanyń anasy aýrýdyń alǵashqy belgileri bastalǵanda jekemenshik emhanadaǵy ózderiniń jeke dárigerlerinen keńes alǵany belgili boldy.