Menıngıtke shaldyqqandardyń barlyǵyn bir dárimen emdeýge bolmaıdy - Tamara Dúısenova

ASTANA. QazAqparat - Menıngokokkke shaldyqqandardyń barlyǵyn bir antıbıotıkpen emdeýge bolmaıdy. Bul týraly búgin «Nur Otan» partııasynda elimizde mınıngokokk juqpasynyń aldyn alýǵa arnalǵan sharada partııa hatshysy Tamara Dúısenova aıtty, dep habarlaıdy QazAqparat tilshisi.

«Keshe respýblıkadaǵy birneshe juqpaly aýrýlar aýrýhanasyna arnaıy qońyraý shaldym. Barlyǵy da birdeı antıbıotık qoldana bastapty. Áriptester, shtammdy teńdestirý qajet. Ár óńirde, ár adamda ol ártúrli bolýy múmkin. Barlyǵyna birdeı bir ǵana antıbıotıkti paıdalanýǵa bolmaıdy. Árqaısysynyń antıbıotıkke sezimtaldyǵy ártúrli. Eger biz qazir bir antıbıotıkti ǵana qoldanatyn bolsaq, onyń saldary munan da jaman bolýy yqtımal. Sondyqtan da antıbıotıkke sezimtaldyǵyn anyqtap, durys sheshim qabyldaýdy ótinemin», - dedi Tamara Dúısenova.

Osy rette ol Almaty qalasy men Almaty oblysy jáne Astana qalasy men Aqmola oblysy ózara is-qımyldy qamtamasyz etýi tıistigin basa aıtty.

«Bizde barlyq ýaqytta da mundaı boldy jáne ol jumys isteýi tıis. Balany bir aýdannan ekinshisine «laqtyrýdy» qoıyńyzdar. Árbir aýrýhana «páleden» aýlaq bolǵysy keletindigin, ólim-jitim boıynsha nashar statıstıkany ózine jazýdy qalamaıtyndyǵyn túsinemin. Biraq, áriptester bul adamdardyń ómiri, otbasynyń taǵdyry. Sol balanyń ornyna Sizdiń balańyz bolýy múmkin. Mundaı kezde ózińizdiń basyńyzdaǵy jaǵdaı sııaqty qabyldańyzdar», - dedi jaýapty hatshy.