Menıngıt: Qyzylordada lagerge baratyn balalar medıtsınalyq baqylaýdan ótedi

QYZYLORDA. QazAqparat - Jazǵy tynygý lagerine baratyn balalar tolyqtaı medıtsınalyq baqylaýdan ótedi, dep habarlaıdy QazAqparat tilshisi.

Oblystyq qoǵamdyq densaýlyqty saqtaý departamentiniń basshysy Ulbosyn Ahanaeva bul shara óńirde menıngokokty ınfektsııa jaǵdaıy boıynsha qolǵa alynyp otyrǵanyn jetkizdi. Dene qyzýy ólshenip, aýrý belgilerine shaǵymdaryn tyńdaıdy. Al, syrttan keletin jolaýshylarǵa aqparattyq túsindirý jumystary júrgizilýde.

«Árbir adam aýyrmaýdyń basty jolyn tabýy kerek. ıAǵnı, tazalyqty súıip, gıgıena saqtaýy qajet. Eger sál aýrý belgileri bilinse, dereý medıtsınalyq betperde kıedi. Eń aldymen, jan-jaǵyndaǵy adamǵa ınfektsııa juqtyrmaýdy oılaýy tıis», - dedi U.Ahanaeva.

Sonymen qatar, oblys boıynsha kúndelikti jedel járdem dárigerlerin shaqyrtýshylar sany myńnan asty. Bul shaqyrtýlar ádettegiden 25 paıyzǵa artqan. Al, juqpaly aýrýlar aýrýhanasyna kúnde 80-85 adam túrli aýrý belgilerimen shaǵymdanyp, dárigerlerden keńes alýda.

Esterińizge sala ketsek, buǵan deıin oblysta menıngokokty ınfektsııa juqtyrǵan Jańaqorǵan aýdanynyń turǵynynan ınfektsııa 31 mamyrda anyqtalyp, ol 2 maýsymda aýdandyq aýrýhananyń jansaqtaý bóliminde kóz jumdy.

Onymen baılanysta bolǵan 65 azamattyń 50-ne júrgizilgen profılaktıkalyq em sharalary aıaqtaldy. Qalǵan 15 azamat dári-dármekpen emdelýde.