Meniń deńgeıime jetip alsyn - Angelına Lýkas Nazym Qyzaıbaı týraly
Almatyda tıtýldyq jekpe-jek aldynda ótken baspasóz máslıhatynda jýrnalıster Angelınadan Nazym Qyzaıbaımen kezdesýge daıyndyǵy týraly surady.
Men kásipqoı boksta osymen úshinshi ret ataq úshin aıqasqa shyqqaly otyrmyn. Nazym Qyzaıbaı aldymen kásipqoı rıngte, shlemsiz jekpe-jek ótkizip kórsin, sezinsin. Meniń reıtıngim odan joǵary. Meniń deńgeıime jetip alsyn. Men daıynmyn, -
dedi kásipqoı boksshy Angelına Lýkas.
Boks keshin uıymdastyrýshy Álimjan Qaldııarov shoý kórsetkisi keletin boksshylarǵa qoldaý kórsetýge daıyn ekenin jetkizdi.
Al, erteń Angelına Lýkas (2-0, 1 KO) tanzanııalyq minezdi qyz Lýlý Kaıagemen (8-8-4, 2 KO) UBO chempıondyq tıtýlyn sarapqa salady.
Erteńgi jekpe-jekke keletin bolsaq, qarsylas tájirıbeli. Biraq, men jeńiske jetýim kerek, óıtkeni bizdi mańyzdy mereke – Táýelsizdik kúni kele jatyr, keshti DAZN de kórsetedi. Men qolymnan kelgenniń bárin jasaımyn, -
dedi Angelına Lýkas.
Eske salaıyq, 11 jeltoqsan kúni kásipqoı boks shoýynyń basty jekpe-jegi jeńilip kórmegen Janqosh Turarov (25-0, 18 KO) pen azýly ıspanııalyq Lýıs Enrıke Romero (11-5-1, 7 KO) arasynda ótedi. Qaýipti ári asa tartysty bolatyn bul aıqasta IBO Intercontinental chempıondyq tıtýly báske tigilgen.
Lýıs Enrıke óziniń DAZN aıasynda ótken sońǵy jekpe-jeginde myqty rýmyndyq rıng sheberin nokaýtpen jeńip, álemdik Boxrec reıtıngindegi TOP-60 boksshynyń qataryna kirdi.
Boks keshinde Elhan Tabynbaev (5-0, 3 KO) pen brazılııalyq Mateýs Da Sılvamen (7-0, 3 KO) judyryqtasady. Álıhan Tólenbaev (2-0, 1 KO) pen Adlan Selmýrzaev (4-0, 3 KO) sekildi jastar da ónerin kórsetedi.