Meniń baılyǵym - meniń ólmes óleńderim - Muhtar Shahanov
Qala ákimi Erlan Aıtahanovtyń qoldaýymen, ishki saıasat jáne din isteri jáne Mádenıet, tilder jáne arhıvter basqarmalarynyń uıymdastyrýymen ótken «Bódene talanttar men Qajymuqandar» atty kesh aqynnyń shyǵarmashylyǵy men «Jalyn» jýrnalynyń 50 jyldyǵyna arnaldy.
QR Prezıdenti Qasym-Jomart Toqaev «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty halyqqa Joldaýynda «elimizde tanymal tulǵalardyń eńbekterin halyq arasynda dáripteýimiz kerek» dep atap kórsetken bolatyn. Osy rette uıymdastyrylǵan qazaqtyń áıgili aqyny, Qazaqstannyń Halyq jazýshysy Muhtar Shahanovtyń keshinde «Zablýjdenıe tsıvalızatsıı» atty jańa kitabynyń tusaýy kesildi. Kesh qonaqtary jazýshy «Qurmet» ordeniniń ıegeri Marhabat Baıǵut, jazýshy «Jalyn» jýrnaly bas redaktorynyń orynbasary Qudııar Bilál, Qazaqstan Respýblıkasynyń Mádenıet qaıratkeri Zylıha Jantasova jáne «Otyrar alqaby» gazetiniń bas redaktory Almas Aqylbek sóz sóılep, esteliktermen bólisti. Qalyń oqyrmanǵa jol tartqaly otyrǵan jańa týyndyny taldap, pikir qaldyrdy.
Óz kezeginde kesh keıipkeri aqyn, jazýshy Muhtar Shahanov sóz alyp, kópshilik jurtqa ystyq yqylasyn bildirdi.
«Men, Qazaqstandaǵy eń sońǵy, eń nashar aqynmyn. Sebebi, men tek shyndyqty aıtatyn, týra sóıleıtin adammyn. Eshqashanda jaǵympazdyq jasaǵan emespin. Eńbegim úshin 120 memleketten syılyq aldym. Biraq, baılyqqa qyzyqqan emespin. Meniń baılyǵym sol - qazaq tili, dili, dini, meniń ólmes óleńderim»,- dedi.
Basqosýda sondaı-aq, qalamgerdiń «Rýh pen til», «Erlerdi erlikke shaqyrý» syndy ánderi oryndaldy. «Tórt ana», « Áıelder balladasy» syndy óleńderi oqyldy. Qalyń oqyrman aqynnyń jigerli, patrıottyq óleńderimen sýsyndady. Qoǵam qaıratkeriniń qazaq halqy úshin eńbegi eren ekeni aıtyldy. Sebebi, ol álem nazaryn tartylǵan Aral teńizine aýdaryp, dúnıejúzilik deńgeıge kóterdi. Jeltoqsan oqıǵasyn zertteý jóninde komıssııa qurylyp, sonyń múshesi boldy. Naýryz meıramynyń halyqpen qaýyshýyna muryndyq boldy.
Kesh barysynda aqynnyń óleńderinen úzindi oqyǵan búldirshinder jıynnyń shyraıyn ashty.