«Meniń atym Qoja» túrik tiline aýdaryldy

ANKARA. QazAqparat - Túrkııanyń bas qalasy Ankaranyń Kechıóren aýdanynda Qazaqstan mádenıet kúnderi sheńberinde ataqty balalar jazýshysy Berdibek Soqpaqbaevtyń «Meniń atym Qoja» kitabynyń jáne osy týyndynyń jelisimen túsirilgen fılmniń tusaýkeseri bolyp ótti, dep habarlaıdy Túrkııa Radıo Televızııa portaly.

Qazaqstan kúnderi aıasynda Qazaqstannyń Túrkııadaǵy Tótenshe jáne Ókiletti elshiliginiń qoldaýymen uıymdastyrylǵan sharaǵa marqum jazýshynyń qyzy, jazýshy, aýdarmashy Samal Berdibekqyzy jáne nemeresi, sondaı-aq 1968 jyldary jazýshy qyzmet etken «Baldyrǵan» jýrnalynyń bas redaktory Dúısen Músiráli, Aqtóbe oblysy ákimdigi men Almaty oblysy Jambyl aýdanynyń delegatsııasy arnaıy keldi.

Qazaq kınomatografııasynyń 50 jyldan beri kórsetilip kele jatqan «Meniń atym Qoja» atty klassıkalyq fılmi men túrik tiline aýdarǵan kitabynyń tusaýkeseri Kechıóren mýnıtsıpalıtetiniń Nedjıp Fazyl sahnasynda bolyp ótti.

Astananyń 20 jyldyǵyna arnalǵan is-sharalar aıasynda túrik tiline aýdarylǵan «Meniń atym Qoja» atty shyǵarmanyń tusaýkeserine Qazaqstan Tótenshe jáne Ókiletti elshisi Abzal Saparbekuly, Kechıóren mýnıtsıpalıteti laýazymdylary, Eýrazııa jazýshylar odaǵy tóraǵasy ıAkýb Ómeroǵlý, aýdarmashy Jámıle Kynadjy jáne  kınosúıer qaýym qatysty.

Eýrazııa jazýshylar odaǵy basyp shyǵarǵan kitapty túrik oqyrmandary úshin qazaq ádebıettanýshy Jámıle Kynadjy aýdarǵan.

Esterińizge sala keteıik, «Meniń atym Qoja» kitaby álemniń 61 tiline, al fılmi 10-nan astam tilge aýdarylǵan.