«Meniń atym - Qoja» endi kórsetilmeýi múmkin» - BAQ-qa sholý

ASTANA. 9 aqpan. QazAqparat - «QazAqparat» agenttigi respýblıkalyq basylymdarda 9 aqpan, seısenbi kúni shyqqan ózekti materıaldarǵa sholýdy usynady.

***

«Keshe Aýyl sharýashylyǵy mınıstrliginde vıtse-mınıstr Gúlmıra Isaevanyń qatysýymen baspasóz máslıhaty bolyp ótti. Baspasóz máslıhaty 2012 jyldyń qyrkúıeginde Soltústik Qazaqstan oblysyna Avstrııadan ákelingen 722 bas iri qara maldyń aýrý bolyp shyǵýyna baılanysty, olardy joıý týraly sheshim qabyldanýyna oraı BAQ-tarǵa túsinikteme berý úshin uıymdastyryldy»,-dep jazady «Egemen Qazaqstan» basylymy búgingi sanyndaǵy «Maldan aýrý shyqqany anyq boldy» atty maqalada. Eske sala keteıik, 2012 jyl­dyń qyrkúıeginde Soltústik Qa­zaqstan oblysynyń «Leonov» sharýa qojalyǵyna jáne «Poltavskoe» JShS-ine Avstrııadan 722 bas iri qara maly ákelingen bolatyn. Ákelingen mal veterınarlyq talaptarǵa saı karantınge alyndy. «Leonov» sharýa qojalyǵynda karantın kezinde barlyǵy 10 bas mal ish tastaǵan, olardan alynǵan materıaldar (3 ish tastalǵan uryq) Sibir jáne Qıyr Shyǵys eksperımentti veterınarııa ınstıtýtyna (Novosibir qalasy) zertteý­ge jiberildi. Zertteýler atalǵan maldardyń boıynda vırýstyq dıareıanyń bar ekendigin anyqtaǵan.

Osy basylymda «Alataıaqtylar týraly anekdot nege kóp?» degen maqala jaryq kórdi. El ishinde MAI týraly anekdot, kúldirgi áńgimeler óte kóp. Kez kelgen kólik júrgizýshisi alataıaqtylarmen arada bolǵan jaǵdaıdy maıyn tamyzyp aıtyp beredi. «Júrgizýshiler úshin MAI jol boıynda tek aqsha jınaý úshin turady, bular jol erejesin buzǵan saıyn olar qýanady, qujattaryn tekserý úshin toqtatsa da birden «birdeńe dámetip tur» dep oılaıdy. Árıne, shopyrlar da mundaı áńgimelerdi aspannan almaıtyny belgili. Alataıaqtylardyń alaqany qyshyǵany bir bólek, olar sol parany alý úshin oılap tappaıtyndary joq. Ótkende ǵana «Tıtýs» saıtynda shymkenttik bir MAI qyzmetkeriniń ana qujatty bir surap, myna qujatty bir surap, aqyry túk tappaǵan soń júrgizýshige «RNN, SIK-iń bar ma?» dep tıiskenin aıdaı álemge kórsetti»,-dep jazylǵan bul maqalada.

***

«Aıqyn» gazetiniń jazýynsha, jahandaný dáýirinde qazaq halqyn úlken syn kútip tur. Ol - halqymyzdy ult retinde saqtap qalý jáne Qazaqstandy álemdegi otyz ozyq memlekettiń qataryna qosý. Ulttyq rýhsyz ultty saqtap qalý múmkin emes. Al ultymyzdy saqtaǵymyz kelse, ulttyq patrıotızmdi myqtap damytýymyz qajet. Ulttyq patrıotızm arǵy tamyry tereń tarıhtan, baı mádenıetten meılinshe nár alǵanda ǵana qýatty túrde damıdy. «Mádenı mura» memlekettik baǵdar­lamasy qolǵa alynyp, iske asyryla bas­taǵaly bıyl týra on jyl. Elbasynyń tikeleı qoldaýymen dúnıege kelgen mun­daı joba dúnıejúziniń basqa elderinde buryn-sońdy qolǵa alynbaǵan eken. Ta­­laı nárse túgeldendi, aýyz toltyryp aıtar irgeli ister isteldi, irgemiz bútindeldi. Bi­raq buǵan toqmeıilsýge áste bolmaıdy. «Mádenı mura» baǵdarlamasy meılinshe jalǵasa berýi tıis! Óz qazaǵymyzdy, óz ata-babalarymyzdy zertteýmen shektel­meı, taǵdyr-tamyrymyz bir bolǵan túrki halyqtaryn da qosa zertteýimiz kerek. Bul maqala kópshilik nazaryna «Er túriktiń qara shańyraǵy - Qazaqstan» degen taqyryppen usynylyp otyr.

«Aıqyn» gazetinde «Meniń atym - Qoja» endi kórsetilmeýi múmkin» degen maqala berilgen. Talaı qazaq balasy kórip ósken, ulty­myzdyń «altyn qoryna» engen «Meniń atym - Qoja» fılmin balalardyń kórýine endi tyıym salynýy múmkin. Búginde Parlamentte jas qazaqstandyqtardy, olardyń densaýlyǵyna jáne damýyna zııan keltiretin aqparattardan qorǵaýdy qarastyratyn, tyıym qoıatyn zań jobasy qaralýda. Árıne, depýtattar: «oǵan bara qoımas!» degendi aıtady. Biraq zań qabyldanǵan soń, sheshimdi olar emes, ýákiletti organ tartatyn sarapshylar shyǵarmaq. Al zań jobasynda «balany qoǵamǵa jat jáne quqyqqa qarsy is-áreketterge arandatatyn - balanyń... psıhotroptyq nemese eseńgiretetin zattardy paıdalanýyna, ... qańǵybastyqpen jáne qaıyrshylyqpen shuǵyldanýyna túrtki bolatyn aqparaty» bar týyndylarǵa tyıym salý kózdelgen. Endeshe, ustazynyń sómkesine baqa sa­latyn, synyptasyna sııany rogatkamen atatyn, balyqqa baryp, kórshiniń aýyn «urlaıtyn», irgeles aýyldaǵy beıtanys úıde búldirshindi aldap soǵyp, etin jep, qymyzyn iship ketetin Qojanyń qy­lyqtaryn sarapshylardyń «qoǵamǵa jat já­ne quqyqqa qarsy is-áreketter» dep baǵala­masyna, fılmniń basty keıipkerin uzyn­tura Sultannyń temeki tartýǵa úı­retýin - «psıhotroptyq nemese eseńgire­tetin zattardy paıdalanýǵa túrtki bolý» dep tappasyna, tipti basty qos keıipker­diń úıden qashyp, el kezýin - «qańǵybas­tyqpen shuǵyldaný» dep aıyptamasyna kim kepil? Suraq kóp. Sondyqtan bolsa kerek, osy zańdy pysyqtaıtyn jumys tobyna je­tekshilik etetin ultjandy de­pýtat Aldan Smaıyl, osy toptyń keshegi ótken otyry­synda, daý týǵyzar kóptegen pozıtsııalar boıynsha sheshim qabyldaý­dy keıinge qaldyrdy, ol Májilistiń Zań­nama jáne sot-quqyqtyq reforma ko­mı­tetine álgi bap­tardy jáne solarǵa qatysty depý­tat­­tardyń engizgen túzetýlerin ma­mandarmen jeke qarap, biryńǵaı ustanym-baılam túzýdi usyndy.

***

«Qarý ustaǵan qazaqtar kóbeıip ketti. Qarapaıym halyqtyń qolyndaǵy travmatıkalyq jáne basqa da qarýlardyń kóbeıgenine quqyq qorǵaý salasynyń mamandary da alańdaıdy. Elimizdiń ár aımaǵynda jıi oryn alyp júrgen jastar tóbelesiniń sońy bir-birine oq atyp, qaıǵyly jaǵdaımen aıaqtalatyny jasyryn emes. Qıt etse qarý kezenetin jastardy qandaı agressııalyq kúsh tárbıeleýde?»,-dep jazady «Astana aqshamy» basylymy búgingi sanynda. Astana qalasynda qarý-jaraq satatyn 11 arnaýly dúken bar. Ótken jyly on bes myńǵa jýyq adam qarý ıelengen. Ańshylyqpen aınalysatyndar jáne óziniń qaýipsizdigin qamtamasyz etý úshin qarý alǵysy keletinderdiń qatary ulǵaıýda.