Meniń ákem men anama qazaqtar qatty kómektesti - Vıktor Pak

TALDYQORǴAN. QazAqparat - 1 naýryz - Alǵys aıtý kúni qarsańynda Qaratal aýdanynyń Bastóbe aýylynda eske alý mıtıngisi ótti. Jıynda Almaty oblysyna jer aýdarylǵan koreılerdiń urpaǵy Vıktor Pak aman qalǵany úshin Qazaq halqyna alǵys aıtty, dep habarlaıdy QazAqparat tilshisi.

1937-1938 jyly koreı ultynyń myńdaǵan ókili Almaty oblysy Qaratal aýdanynyń Bastóbe aýylynyń mańyna jer aýdarylǵan bolatyn. Kúzdiń sýyǵynda ash-jalańash, til túsinbeıtin ultty qazaq baýyryna basty. Ózderi de qıyn qystaý zamandy basynan keshirip jatqan jergilikti turǵyndar koreılerdi kelimsek demedi. Bir úzim nanyn bólip, baýyryna basty. Úıiniń bir bólmesin bosatyp bergen. Bastóbe taýynyń etegine baspana salyp berip, aman qalýyna sebepshi bolǵan.

Búgingi tańda Qaratal aýdanynda koreılerdiń sany 4 myńǵa jetse, oblys boıynsha 16 myńnan asady. Urpaǵyn ósirip, tili men dilin saqtap, eńbek etip, el qataryna qosylǵan etnostyń qazaq halqyna degen alǵysy sheksiz.

Sol urpaqtyń ókili Vıktor Pak búginde Qaratal aýdanynyń Eskeldi aýylynda turyp jatyr. 67 jasar zeınetker 40 jylǵa jýyq zootehnık bolyp eńbek etken.

Qarııa ulyn uıaǵa, qyzyn qııaǵa qondyryp aýyl halqymen birlikte ómir súrip jatqanyn aıtady.

Vıktor Pak qazaq balalarymen taı-qulyndaı tebisip, oınap-kúlip, qatar óskendikten qazaq tilin óte jaqsy meńgergen.

«Meniń ákem men anama qazaqtyń otbasy qatty kómektesti. Nan berdi, sút berdi, qurt berdi. Sodan keıin úı berdi. Biz osynda óstik. Biz alǵys retinde munda tastan eskertkish qoıdyq. Qazaqtyń halqyna myń alǵys!», - deıdi koreı etno-mádenı birlestigi janyndaǵy aqsaqaldar keńesi tóraǵasynyń orynbasary Vıktor Pak.