Men úshin azamattardyń turmys sapasynyń is júzinde jaqsarýy áldeqaıda mańyzdyraq - Memleket basshysy
Prezıdent 2029 jylǵa qaraı ulttyq ekonomıkanyń kólemin eki ese arttyryp, 450 mıllıard dollarǵa jetkizý jospary jaıly áńgimeledi.
«Árıne, bul — jetýge bolatyn meje. Halyqaralyq valıýta qorynyń sarapshylary 2023 jyldyń qorytyndysy boıynsha Qazaqstannyń Іshki jalpy ónimi qazirgi baǵamen eseptegende 259 mıllıard dollardan asady, ıaǵnı 2022 jylmen salystyrǵanda 15 paıyzǵa artady dep baǵalap otyr. Bul — Ortalyq Azııadaǵy eń joǵary aqshalaı ósim. Jan basyna shaqqandaǵy ishki jalpy ónim de ósip keledi. Buǵan qatysty boljamdy kórsetkish byltyr 13 myń dollarǵa jýyqtady. Onyń jyl saıynǵy ósimi 1,6 myń dollar bolady dep baǵalanýda. Halyqaralyq valıýta qorynyń boljamyna sáıkes, 2028 jylǵa qaraı bul kórsetkish otyz paıyzdan da kóbirek artyp, 16,8 myń dollarǵa jetedi», — dedi Prezıdent Egemen Qazaqstan gazetine bergen suhbatynda.
Memleket basshysy shyn máninde ózi úshin makroekonomıkalyq kórsetkishter sonshalyqty mańyzdy emes, azamattardyń turmys sapasynyń is júzinde jaqsarýy odan áldeqaıda mańyzdyraq ekenin basa aıtady.
«Halqymyz „Jaqsy sóz — jarym yrys“ deıdi. Úkimet ekonomıkany basqarýdyń tyń tásilderin qoldana alsa, jańa aıtylǵan jaqsy boljamdar aqıqatqa aınalady. Osy oraıda negizgi eki baǵytqa toqtalaıyn. Birinshiden, elimizdiń órkendeýine jol ashatyn birqatar naqty mindetti sheshý qajet. Sondaı mindettiń biri — aýqymdy ónerkásip jobalaryn júzege asyrý. Qyrkúıektegi Joldaýda Úkimetke mundaı jobalardy anyqtaý jáne Infraqurylymdy damytý josparyn ázirleý týraly tapsyrma berildi. Bul jobalar iri bıznes ókilderimen, ınstıtýtsıonaldy ınvestorlarmen jáne sarapshylarmen birge pysyqtalyp, naqty jumys jasalyp jatyr», — dedi Qasym-Jomart Toqaev.
Prezıdent taǵy bir mańyzdy mindet retinde ınvestıtsııa tartýdy atady.
«Bul mindetti oryndaýǵa jekeshelendirý jáne aktıvterdi qaıtarý naýqandary da septigin tıgizedi. Qomaqty ınvestıtsııa bolsa, ekonomıka qarqyny údeıe túsedi jáne jańa múmkindikter paıda bolady. Osy oraıda men jaqynda Investıtsııa shtabyn qurý týraly Jarlyqqa qol qoıdym. Bul shtabqa elimizdegi ınvestıtsııalyq ahýaldy jaqsartý jáne ınvestıtsııalyq jobalardy sapaly júzege asyrý úshin aýqymdy ókilettik berilgen. Ekinshi baǵyttaǵy jumys ekonomıkanyń barlyq salasyna qatysty „oıyn tártibin“ belgileıtin júıeli reformalardy júzege asyrý sharalaryn qamtıdy», — dedi Memleket basshysy.