Men oralam: Golovkınniń jarııalaǵan vıdeosyn 1,5 mln adam kórdi

ASTANA. QazAqparat - Qazaqstandyq boksshy Gennadıı Golovkın Instagramdaǵy akkaýntynda meksıkalyq Saýl Alvarespen bolǵan jekpe-jeginen keıingi sátterden vıdeo jarııalady, dep habarlaıdy QazAqparat.

Vıdeo boksshylardyń rıngtegi aıqasynan úzindiden bastalady. Odan ári, jekpe-jek aıaqtalǵan soń Golovkınniń tynyǵý bólmede júrgenin, sondaı-aq jýrnalısterdiń aldyna shyǵyp bara jatqan sátin kórýge bolady.

«GGG» BAQ ókilderine bergen suhbatynda: «Meniń ishki baqylaýym oıdaǵydaı... Jekpe-jekti tamashalaýǵa kelgenderińiz úshin rahmet», - dedi. Sondaı-aq ol tamasha aıqas bolǵanyn jáne «qaıta oralatynyn» atap ótti.

Boksshy ornalastyrǵan vıdeony osy ýaqytqa deıin 1,5 mln adam kórgen. Qazaqstandyqtar men sheteldegi jankúıerler onyń astyna óz pikirleri men qoldaý sózderin qaldyrýda.

«Siz - eń úzdik boksshysyz», «Sizdi jaqsy kóremiz», «Siz bizdiń chempıonsyz», - dep jazýda olar.

Eske salaıyq, Golovkın - «Kanelo» rematchy 16 qyrkúıek kúni Amerıka Qurama Shtattarynyń Las Vegas qalasynda ótken bolatyn. Nátıjesinde otandasymyz tóreshiler sheshimimen (113-115, 114-114, 113-115) jeńilip, WBA Super, WBC jáne IBO tujyrymdary boıynsha orta salmaqtaǵy chempıondyq beldikterinen aıyryldy. Olardyń birinshi aıqasy byltyr teń nátıjemen aıaqtalǵan edi.