Men myń ólip, myń tirilgen qazaqtyń birimin - Uly Otan soǵysynyń ardageri B. Amangeldıev
«Búgingi sharaǵa rızashylyǵym sheksiz. Elbasynyń bizdi quttyqtap, qurmet kórsetkeni biz úshin úlken toı! Sondyqtan, Elbasyna sheksiz rahmetimdi aıtamyn. Sonymen qatar, búgin ózdigimen júre alatyn ardagerlerdiń basyn qosyp, syı-syıapat kórsetken ákimdikke de rızamyn», - B. Amangeldıev.
Bısultan aǵa, qan maıdanda bir emes, úsh ásker qatarynda soǵysqan jaýynger.
«Men soǵysqa 1942 jyly 17 jastan endi asqan shaǵymda attandym. Birinshi Ýkraına maıdanynda jaıaý ásker qatarynda, avtomatshy bolyp soǵystym. Keıin, tank ýchılışesine oqýǵa jiberildim. Úshinshi tank armııasynyń sapynda Ýkraına jerinde soǵystym. Ternopol qalasyn jaýdan azt etý barysynda aýyr jaraqat aldym. Alty aı gospıtalda jattym. Dárigerler men ólim aýzynan arashalap qaldy. Keıin, Ekinshi Áskerı-Áýe Kúshteri armııasynyń sapynda radıst bolyp qyzmet arqardym. Polshany, Rýmynııa, Chehoslovakııany jáne Vengrııany jaýdan azat ettik. Jeńis kúnin Vengrııada qarsy aldym. Biraq, men úshin soǵys áli aıaqtalǵan joq edi. 1945 jyldyń qazan aıyna deıin Vengrııa jerinde jaýdyń qalǵan-qutqan áskerlerimen soǵystyq. Tek qarasha aıynda ǵana elge oraldym», - deıdi B. Amangeldıev.
Bısultan aǵa, Qyzyl juldyz ordeniniń jáne basqa kóptegen medaldardyń ıegeri.
Elge oralǵan soń, ol tyń kóterý isine aralasty. Keıin, qolyna qalam alyp, «Sotsıalıstik Qazaqstan», «Qazaqstan pıoneri» gazetterinde eńbek etti. Budan soń, 38 jyl ómirin QazTAG agenttigine arnady. Munda ol aýdarma bóliminiń redaktory, odaqtyq jáne sheteldik aqparat bas redaktsııasynyń meńgerýshisi bolyp qyzmet atqardy. Bıyl 89 jasqa tolǵan Bısultan aǵa, áli tyń.
«Aldaǵy jyly, 90 jasymda Uly Jeńistiń 70 jyldyq mereıtoıyn kórsem», - dep armandaıdy.