«Men qazaqpyn» megajobasynyń ekinshi kezeńi bastalady

ASTANA. QazAqparat - «Qazaqstan» RTRK»  AQ basqarma tóraǵasy Erlan Qarın «Men qazaqpyn»  atty xalyqaralyq jobanyń ekinshi maýsymyn bastaıtynyn jarııalady, dep xabarlaıdy QazAqparat tilshisi.

«Men qazaqpyn»  xalyqaralyq megajobasy bıyl da jalǵasatyn bolady. Aldymen sáýir-mamyr aılarynda aýdandarda irikteýler ótedi. Odan keıin oblystyq irikteýler uıymdastyrylady. Baıqaýdyń bıylǵy aýqymy da keń. Ótken jyly Qytaı, Mońǵolııa men Reseıde ótti. Bıyl da solaı bolady. Aǵymdaǵy jyly Qyrǵyzstanda ótkizýdi josparlap otyrmyz. Sol jaqtaǵy baýyrlarymyzdy da tartamyz. Sosyn ótken jyly Reseıdiń Qosaǵash jerinde uıymdastyrylsa, bıyl Astraxanda ótkizeıik dep otyrmyz. Osylaısha, jyldan jylǵa qalyń qazaq mekendegen syrttaǵy mekenderdi tartyp, sol jaqtaǵy qandastarymyzdy úlken saxnaǵa shyǵaratyn bolamyz» , - dedi E.Qarın Astanada ótken baspasóz máslıxatynda.
 

Onyń aıtýynsha, bıyl baıqaýdyń belgisi da ózgergen. Jobanyń shetelde ótetinin eskerip, belgini latyn árpimen jazý uıǵarylǵan. «Ótken jyly Qytaıǵa, Mońǵolııaǵa barǵanda áriptesterimiz kırıllıtsamen áripterdi oqı almaı, biraz qınalǵan bolatyn. Latyn qarpine kóshkenimizge biz de qýanyp otyrmyz. Sonyń arqasynda jobamyz keńinen tanylady» , - dep atap kórsetti E.Qarın.

«Men qazaqpyn» megajobasynyń gala-kontsertin dástúr boıynsha Táýelsizdik kúni - 16 jeltoqsanda uıymdastyrý josparlanǵan. Sol kezde baıqaýdyń jeńimpazdary da anyqtalady.

Aıta keteıik, ótken jyly «Men qazaqpyn» megajobasyna 3 myńnan astam adam qatysýǵa ótinish bildirgen. Іrikteýler Qytaı, Reseı men Mońǵolııa jerinde de ótti. Al Astanadaǵy týrǵa 57 adam irikteldi. Qazylar alqasynyń sheshimine sáıkes, «Úzdik ánsh­i» atalymynyń jeńimp­azy Taldyqorǵan qalasynyń abyroıyn aspand­atqan Beıbit Musaev atandy. «Úzdik kúıshi» atalymynda aqtóbelik Ardaq Eleýsiz daralandy. «Úz­dik termeshi» atalymyn mańǵystaýlyq Ospan Qulsymaq jeń­ip aldy. Al Jambyl oblysynyń ókili Sulýjan Ábenova eń kóp daýys jınap, «Kórermen kózaıymy» atandy.