«Men qazaqpyn» mega-jobasyna qatysatyn qaraǵandylyqtar irikteldi
Qalalar men aýdandardan 5 termeshi, 16 kúıshi men 15 dástúrli ánshi óner kórsetti.
Ádil qazylar quramyna QR eńbegi sińirgen qaıratkeri, Táttimbet atyndaǵy akademııalyq orkestriniń kontsertmeısteri Polathan Táshimov, Q.Baıjanov atyndaǵy kontserttik birlestiginiń jetekshi solısi, respýblıkalyq konkýrstardyń laýreaty Dáýrenbek Árkenov jáne tanymal aqyn, aıtysker Tólegen Ádilov sekildi kórnekti mádenıet qaıratkerleri endi.
Sharany «Qazaqstan» RTRK basshysy Erlan Qarın tamashalady. Ol búginde «Men qazaqpyn» mega-jobasyna 428 úmitker qatysyp, onyń 40-y jeńimpaz atanǵanyn atap ótti. «Qaraǵandyda ótip jatqan irikteý kezeńinde jeńimpaz atanǵandar halyqaralyq mega-jobaǵa joldama alady. «Men qazaqpyn» jobasy ulttyq óner men mádenıetti nasıhattaýǵa baǵyttalǵan jáne osy jobaǵa qatysýshylarǵa úlken sahnaǵa jol ashady. Jobanyń maqsaty - shalǵaı aýyldar men túrli aýdandarda ulttyq ónerge berilgen jandardy taýyp, kópshilikke tanymal etý, ónerge jol ashý» - dedi Erlan Qarın.
Sonymen, «Terme óneri» nomınatsııasy boıynsha Nurmuhammed Baısuǵyrov (Shahtınsk q.) jeńimpaz atansa, «Dástúrli ánshi» nomınatsııasynda Ánýar Adambaev (Abaı q.) jeńiske jetti, «Kúıshi» atalymynda Balqan Smaǵulov (Qaraǵandy q.) úzdik dep tanyldy. Bul ónerpazdar respýblıkalyq baıqaýda oblys namysyn qorǵaıtyn bolady.
Aıta keteıik, «Men qazaqpyn» halyqaralyq mýzykalyq jobasy elimizde alǵash ret ótkizilýde. Jobaǵa elimizdiń ár aımaǵy men Reseı, QHR, Monǵolııa men Altaıdan qatysýshylar qatysady. Іrikteý kezeńi shilde aıynda aıaqtalyp, qyrkúıek aıynan bastap «Qazaqstan» ulttyq arnasynyń efırinen kórsetile bastaıdy. Aqtyq kezeńi Táýelsizdik kúni qarsańynda, jeltoqsanda ótedi. Atalmysh joba ulttyq mýzykany nasıhattaýǵa jáne damytýǵa, termeni, kúıdi oryndaıtyn jańa talanttardy izdeýge baǵyttalǵan.
Jobany uıymdastyrýshylar - «Qazaqstan» ulttyq teleradıokorporatsııasy, Qaraǵandy oblysynyń Mádenıet, muraǵattar jáne qujattama basqarmasy, oblystyq ishki saıasat basqarmasy.