Men qazaqpyn – Qazaqstannyń birinshi raketkasy Aleksandr Býblık
Chempıonat saıty málim etkenindeı, A.Býblık ózinde reseılik tólqujattyń joq ekendigin jetkizdi.
«Qos azamattyqqa jol berilmeıtindikten, mende reseılik tólqujat joq. Meniń Reseı tennıs federatsııasymen eshqandaı baılanysym joq. Men qazaqpyn, alty jyldaı ýaqyt boıy elimniń namysyn qorǵap kelemin. Men Devıs kýbogynda, Azııa jáne olımpıada oıyndarynda Qazaqstan atynan shyǵatynymdy maqtan etemin», dedi Aleksandr Býblık.
Qazaqstandyq tennısshi Ulybrıtanııa laýn-tennıs qaýymdastyǵynyń (LTA) reseılik jáne Belarýs oıynshylarynyń Ýımbldon-2022 jáne ózi ótkizetin basqa týrnırlerge qatysýyna tyıym salǵan sheshimi jóninde pikir bildirdi.
«Men bul sheshimniń durys ne burys ekendigine tórelik aıtqym kelmeıdi, biraq osy boıynsha óz pikirimdi bildireıin. Bul – Ulybrıtanııa úkimeti men uıymdastyrýshylardyń sheshimi. Buǵan olardyń quqyǵy bar. Men úshin sporttyń naqty ómirdegi orny bólek bolǵandyqtan, menińshe, sportty tym saıasılandyrmaý kerek. Sport teledıdar aldynda tamashalap, súıikti oıynshyńa nemese komandańa jankúıer bolý úshin qajet. Osy múmkindikti shektegeni úshin fanattarǵa obal», dedi A.Býblık.
Eske sala keteıik, budan buryn tennısten Qazaqstan jasóspirimder quramasynyń Gonkongpen oınaıtynyn, qazaqstandyq tennısshiniń Mıýnhende olımpıada chempıondaryn utqanyn jazǵan bolatynbyz.
Sondaı-aq qazaqstandyq tennısshi Portýgalııadaǵy týrnırdiń shırek fınalyna shyqty.