Men qazaqqa kelin bolatynymdy oqýshy kezimnen bildim – ózge ult ókili

ALMATY. QazAqparat- Qazaq azamatyna turmysqa shyqqan jetisýlyq Lıýdmıla - naǵyz qazaqtyń ınabatty kelini. Barlyq salt-dástúr men tildi meńgergen ol QazAqparat tilshisine baqytty otbasy bolýdyń joldary týraly aıtyp berdi.

Sahıpov Asqar men Mıhaılova Lıýdmılanyń otaý kótergenderine bıyl 16 jyl toldy. Ekeýi de Almaty oblysy, Sarqan aýdany, Sokolovka aýylynyń týmasy. Bir mektepte oqydy.

«Meniń ultym – orys, kúıeýim –qazaq. Óıtkeni, shynaıy mahabbatqa ult ta, din de, til de kedergi bola almaıdy. Joldasym Asqar menen 7 jas úlken. Men oǵan 18 jasymda turmysqa shyqtym. Úılený toıymyzdyń aldynda nekemizdi musylmansha qıdyq. Qudaı jalǵyz jáne barlyq dinniń prıntsıpteri uqsas. Sondyqtan dinge kelgende eshqandaı túsinispeýshilik bolmady. Men qazaqqa kelin bolatynymdy oqýshy kezimnen bildim» ,- deıdi Lıýdmıla.

Ol ózine qazaq halqynyń salt-dástúri men ádet-ǵurpy tańsyq emes ekenin aıtty.

«Qazaqtyń salt-dástúrin kishkentaıymnan bilemin. Sebebi, dostarym, kórshilerim bári qazaq boldy. Qazaq otbasyna birden úırenip kettim. Enem óte jaqsy, meıirimdi, ashyq-jarqyn kisi edi. Bilmegen dúnıemdi aqylǵa salyp, barlyǵyn sabyrmen úıretetin. Sol kisiden úı sharýasyn qalaı júrgizý kerektigin tolyq meńgerip aldym. Úıde eki ulttyń da salt-dástúrin ustanamyz. Orys halqynyń salt-dástúrleri, yrym-tıymdary múldem basqa bolǵanymen mán-maǵynasy jaǵynan qazaq dástúrlerine uqsas. Mysaly, Aıt merekesinde Aıt qabyl bolsyn! dep dastarhan daıyndap, aıttap kelýshilerdi kútsek, Pasha kezinde de tap solaı dastarhan jaıylady»,- deıdi ol.

Asqar men Lıýdmılanyń balalary qazaq balabaqshasyna baryp, qazaq mektebinde bilim alyp jatyr.

«Bir ul, bir qyzymyz bar. Árıne, eki ulttyń mentalıteti, salt-dástúri múldem basqa. Degenmen bala tárbıesine onyń kedergisi joq. Ákesi qazaq, qany qazaq bolǵandyqtan, barynsha ultyna saı tárbıe berip jatyrmyz. Úıde bárimiz qazaq tilinde sóıleımiz. Balalarym qazaq mektebinde bilim alyp jatyr»,- deıdi Lıýdmıla.

Sonymen qatar, ol baqytty otbasy bolýdyń joldary týraly aıtty.

«Otbasynyń baqytty, berekeli bolýy eki jaqqa baılanysty. Baqytty januıa erli-zaıyptynyń bir-birin túsinýinen, qansha qatelikter bolsa da keshirimmen qaraýynan týyndaıdy. Eger eki adam bir-birin shyn máninde qurmettese, syılasa, shyn súıse, álbette baqytty bolady. Meniń oıymsha ózge ultqa kelin bolsań da, ne ózge ultqa kúıeý bala bolsań da, eń bastysy -syılastyq»,-deıdi qazaqtyń kelini Lıýdmıla.