Memsatyp alýdyń «elektrondy dúken» túri engiziledi

NUR-SULTAN. QazAqparat - Memlekettik satyp alýdyń «elektrondy dúken» túri engiziledi. Bul týraly búgin Májiliste «Memlekettik satyp alý máseleleri boıynsha keıbir zańnamalyq aktilerine tolyqtyrýlar men ózgerister engizý týraly» zań jobasynyń tanystyrylymynda QR Qarjy vıtse-mınıstri Rýslan Beketaev aıtty, dep habarlaıdy QazAqparat tilshisi.

«Osy negizdemeni (jańartý tártibimen shyǵarylatyn memlekettik materıaldyq rezervtiń materıaldyq qundylyqtaryn satyp alý; QR zańnamasynda aıqyndalǵan tulǵadan múlikti senimgerlik basqarý jónindegi qyzmetterdi satyp alý; 100 AEK deıin taýarlardy, sondaı-aq 500 AEK deıin jumystar men qyzmetterdi satyp alý) alyp tastaý «elektrondyq dúken» túrinde satyp alýdyń jańa tásilin engizý jolymen óteletin bolady. Ol mundaı taýarlardy, jumystardy 1 jumys kúni ishinde básekelestik negizde satyp alýǵa múmkindik beredi«, - dedi vıtse-mınıstr.

Bul rette Taýarlardy elektrondyq dúken arqyly satyp alýdy memlekettik satyp alý veb-portaly arqyly jumys istep turǵan ınternet-dúkender bazasynda júzege asyrý usynylady.

»Memleket basshysynyń qaǵaz qujat aınalymyn alyp tastaý jáne tolyq tsıfrlandyrý jónindegi saıasatyn eskere otyryp, sondaı-aq elektrondyq kommertsııany damytý jaǵdaıynda osy tásildi engizý óte ózekti bolyp tabylady. Usynylatyn elektrondyq dúken tetigi tapsyrys berýshige taýardy, jumysty nemese qyzmetti tańdaýǵa múmkindik beredi. Bul rette ónim berýshini anyqtaý naryqtaǵy eń úzdik sharttar boıynsha qolda bar usynystar negizinde júrgiziledi«, - dedi Rýslan Beketaev.