Memorgandardyń saıttaryn bir portalǵa qalaı biriktiredi
Kompanııanyń basqarma tóraǵasy Áset Turysovtyń aıtýynsha, búginde san alýan memorgandardyń 296 saıty jumys isteıdi. Olardyń ishinde ortalyq jáne jergilikti atqarýshy organdar bar.
«Basqarmalar, komıtetter jáne taǵy basqa organdardyń saıttarynda san alýan aqparat jarııalanady. Al ol saıttardyń bárin ustap turýǵa bıýdjetten qyrýar qarjy bólinip turady. Halyq bolsa, ózine qajetti aqparatty bólek-bólek izdep jatady. Búginde egov - elektrondy úkimet portaly bar. Biz arnaıy platformany iske qosatyn bolamyz. Sonyń negizinde barlyq memlekettik organdardyń saıttary biriktiriledi. Artynan ony egov-qa qosyp qoıamyz. Sol kezde azamattar bir saıtqa kirip, barlyq qajetti aqparatty bir jerden taba alady. Memlekettik qyzmetten bastap salalyq aqparatqa deıingi barlyq kontent bolady. Ákimdikke qarasty basqarmalardyń saıttaryna deıin barlyǵy bir júıege qosylady», - dedi Á.Turysov Astanada ótken baspasóz máslıxatynda.
Onyń aıtýynsha, atalǵan bastama boıynsha tıisti jumystar bastalyp ketti. Birinshi kezeńde tórt mınıstrliktiń saıty bir arnaǵa qosylady. Osynyń arqasynda qyzmet kórsetýdi jeńildetip qana qoımaı, bıýdjettiń biraz qarajatyn da únemdeýge bolady.
Aıta keteıik, «Ulttyq aqparattyq texnologııalar» AQ jeke qujattardyń elektrondy qoımasyn iske qosýdy josparlap otyr. «Atalǵan jobanyń mańyzdylyǵy nede? Qazirgi kezde biz san alýan málimetterdi Gmail-da, ıaǵnı shetelde saqtaımyz. Al Digi Locker ózimizdiń elektrondy qoımamyz ispetti. Onda jeke kýálik, júrgizýshi kýáligi jáne taǵy basqa resmı qujattardy saqtaýǵa bolady», - deıdi Á.Turysov. Sondaı-aq, kompanııanyń birneshe fýnktsııasyn básekelestik ortaǵa berý josparlanǵan. Onyń ishinde eGov-tyń 1414 baılanys ortalyǵy da bar.