Memorgandardyń esebi bir aqparattyq júıege biriktiriledi
«2000 jyldardyń basynda-aq qaǵazsyz qujat aınalymyna tolyq kóshý mindeti qoıylǵan bolatyn. Qujattar elektrondy túrde jasalyp, qaǵaz túrinde shyǵarylady. Sondyqtan da atalǵan prıntsıpti júzege asyrýǵa qatysty Prezıdent Jarlyǵynda birqatar is-shara kózdelgen. Birinshi – normatıv aıasynda qaǵazben jumys isteýden bas tartý. Bul atalǵan bıznes protsesti aıtarlyqtaı ońtaılandyrady. Óıtkeni, ol qaǵazdy basyp shyǵarýdan bólek árbir qujattyń paraǵyn salystyryp tekserýdi talap etedi. Soǵan oraı qujatty rásimdeýge birshama jumys ýaqyty jumsalady», - dedi ol Ortalyq kommýnıkatsııalar qyzmetindegi baspasóz máslıhatynda.
Sonymen qatar tóraǵa orynbasary protsedýralyq máselelerdiń de jetildiriletindigin atap ótti. Máselen, jaýap berilmegen jaǵdaıda kelisim alyndy degen qural engiziledi.
«Qazirgi ýaqytta tipti memlekettik organnyń eskertpesi bolmasa da ol jobany ázirleýshige jazbasha jaýap berýge mindetti. Endi mundaı qajettilik alynyp tastalady. Bul jaýap daıyndaýǵa ketetin jumys ýaqytyn aıtarlyqtaı qysqartady. Ásirese mundaı norma Ádilet, Ulttyq ekonomıka, Qarjy mınıstrlikteri sııaqty mindetti kelisim berýshi memlekettik organdardyń jumysyn jeńildetedi. Memlekettik organdar arasynda saýal joldaýdy alyp tastaý – bul memlekettik organdardyń ishki bıznes-protsesterin jáne baılanyssyz ózara is-qımyldy ońtaılandyrýǵa baǵyttalǵan kelesi norma. Endgi ýaqytta memlekettik organdardan vedomstvolyq málimetterdi talap etýdiń qajeti joq. Olardy aqparattyq resýrstan ala salýǵa bolady. Resýrstaǵy málimetter qate bolsa, onda derekterdi ózektendirýge jáne jańartýǵa jaýapty memlekettik organ jaýapkershilik arqalaıdy. Sonymen qatar esepterdiń barlyq túrin bir aqparattyq júıege biriktirý josparlanǵan. Endigi ýaqytta memlekettik organdarǵa qajetti málimetterdi ártúrli derekkózderinen izdeýdiń qajeti joq. Olardyń barlyǵy bir júıege shoǵyrlandyrylady», - dedi Aıgúl Shaıymova.