Memorgandardyń BAQ-pen baılanys ornatýyna kedergi jasaıtyn úsh másele qandaı
«Birinshiden, memlekettik organdardyń BAQ-pen qarym-qatynas ornatýynda birqatar problema bar. Memlekettik organnyń qaısysy bolsa da, qazir qoıǵan suraǵyńa «saýal hat joldańyz» dep jaýap beredi. ıAǵnı mundaıda arnaıy saýal hat jazyp, mór basyp, qol qoıyp, skanerleýge týra keledi. Biraq osyǵan qaramastan saýal hatyńyzǵa jaýap kelmeı qalýy da múmkin. Máselen keshe dál osylaı saýal hat ázirlep, joldaıyq desek, Bas prokýratýra óz qolyńyzben kelip, mekemege tapsyrýyńyz kerek deıdi. Pandemııa men HHІ ǵasyrdaǵy tsıfrlandyrý dáýirinde mundaı sharttyń ózi túsiniksiz. Árıne, istiń mundaı reti jumysty edáýir tejep, ashyqtyq pen aqparattyń jyldamdyǵy shetke ysyrylady», - dep oı bólisti Zarına Qasenova Sybaılas jemqorlyqqa qarsy is-qımyl agenttiginiń Facebook paraqshasyndaǵy «Memlekettik organdardyń BAQ-qa ashyqtyǵy máseleleri» taqyrybynda ótken onlaın kezdesýde.
Onyń aıtýynsha, ekinshi másele – bir jerde oqys oqıǵa týyndaǵan kezde memlekettik organdardyń (nemese kompanııalardyń) ol jaǵdaıdy birden rastaýǵa nemese joqqa shyǵarýǵa asyqpaıtyny. Álbette, birden jaýap beretin memorgandar bar. Áıtse de, kóp jaǵdaıda «keıin habarlasamyz» dep ýaqyt sozsa, keıde tipti «saýal hat joldańyz» dep iz-túzsiz ketetinderi de bar.
«Máselen bir jerdi sý basyp, órt sharpyp jatsa, memorgandaǵy qyzmetker maquldaýdy kútip otyrady. Bul máseleni retteý kerek. Sebebi kez kelgen organnyń nemese kompanııanyń abyroıyn kótere alar bir faktor bar desek, ol – belgili bir oqıǵaǵa birden jaýap berý tártibi. Úshinshi másele – qoıylǵan suraqty basqa organǵa nemese kompanııaǵa ysyrý. «Bizdiń quziretimizde emes» degen jaýappen jıi betpe-bet kelemiz. Aqyry qoıylǵan bir saýal birneshe memlekettik organdy aınalyp kelse de, eshkim jaýap bere qoımaıdy», - deıdi ol.
Zarına Qasenova áıtse de mınıstrler men ákimderdiń keıbiri baspasóz hatshylaryn tańdaýǵa muqııat mán beretinin aıtady. Baspasóz hatshylarynyń arasynda týyndaǵan máselege birden jaýap berýge tyrysatyndary da bar.