Memorgandardyń aqparattyq júıesine shartty kıbershabýyldar jasalyp jatyr
«Medıtsına, bilim berý, áleýmettik qamsyzdandyrý sekildi áleýmettik salalarmen qatar, pandemııa memlekettiń tsıfrlyq ınfraqurylymyna da soqqy jasady. Bárińiz de oǵan kýá boldyńyzdar. Memlekettik ınternet-resýrstarǵa enýdegi problemalar tsıfrlandyrý salasyndaǵy uıymdastyrýshylyq jáne tehnologııalyq bazanyń jetkilikti deńgeıde damymaǵanyn kórsetip berdi», - dedi Rýslan Ábdihalyqov OKQ-da ótken baspasóz máslıhatynda.
Onyń aıtýynsha elektrondy úkimettiń aqparattandyrýshy iri nysandaryna árdaıym kıber shabýyldar jasalyp turady. Jyl saıyn aqparattyq qaýipsizdik salasynda buǵan qatysty mıllıardtaǵan oqıǵa tirkeledi.
«Bıyldyń ózinde 4 mıllıardqa jýyq oqıǵa tirkeldi. Odan bólek 200 mıllıonǵa jýyq kıbershabýyl jasaldy. Pandemııa men qashyqtan jumys júrgizý jaǵdaıy – tsıfrlyq ınfraqurylymǵa júktemeni birden artyp jiberdi. Biz buǵan daıyn bolmaı shyqtyq. Qazirgi ýaqytta ótkizilip jatqan kıber jattyǵýlar arqyly týyndaǵan qaýipterge memlekettik organdardyń, aqparattyq qaýipsizdikti qamtamasyz etetin bólimsheler, aqparattyq qaýipsizdiktiń jedel ortalyqtarynyń daıyndyǵy tekserilip jatyr. Shartty túrde belgilengen, ekstremıstik pıǵyldaǵy shabýylshy elektrondy úkimetterdiń aqparattandyrýshy nysandaryna bastyrmalata DDOS-shabýyldardy jasaıdy. Osy shabýylshy memlekettik ınternet-resýrstardy buzý áreketterin jasady, áleýmettik jelilerde shyndyqqa saı kelmeıtin aqparatty taratyp, fıshıng jasady», - dedi ol.
Rýslan Ábdihalyqov osy kıber jattyǵýda nelikten qaýipsizdik sertıfıkaty iske qosylǵanyn aıtyp ótti.
«Pandemııa ýaqytynda shyndyqqa saı kelmeıtin, eldiń aqparattyq zańnamasyn buzatyn málimet kóbeıip ketti. Onyń bári áleýmettik medıa arqyly taraýda. Shynaıy jaǵdaıdy baǵalaý úshin shartty dinı ekstremıster ártúrli aqparatty taratady. Al bul rette memlekettik organdardyń mindeti – ony ýaqytynda anyqtap, naqty shekteý qoıý. Sondaı-aq búkil ınternet resýrstyń shtattyq qyzmetin buzylmaýy tıis», - dedi ol.