Memorgandardy avtokólikpen qamtamasyz etýdiń jańa nusqasy ázirlenedi - mınıstr

NUR-SULTAN. QazAqparat - Memlekettik organdardy avtokólikpen qamtamasyz etýdiń jańa nusqasy ázirlenedi. Bul týraly Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Memleket basshysy Úkimettiń keńeıtilgen otyrysynda Qarjy mınıstrliginiń qyzmetine qatysty eki máselege erekshe nazar aýdardy. Bul – bıýdjet shyǵystaryn ońtaılandyrýdy jáne salyqtyq-kedendik ákimshilendirýdi kúsheıtý, onyń ishinde tsıfrlandyrý arqyly jaqsartý. Prezıdent tapsyrmalarynyń tez arada oryndalýyn qamtamasyz etý úshin kelesideı sharalar qabyldanady.

Bıýdjet shyǵystaryn ońtaılandyrý maqsatynda:

- respýblıkalyq jáne jergilikti bıýdjetterdiń shyǵystaryn ońtaılandyrýdyń ádistemelik negizi ázirlenedi;

- memlekettik josparlaýdyń aqparattyq júıesine «Satyp alýdyń biryńǵaı terezesi» servısi qosylady;

- memlekettik organdardy avtokólikpen qamtamasyz etýdiń jańa nusqasy ázirlenedi;

- daǵdarysqa qarsy jumsalatyn qarajat tıimdiliginiń monıtorıngi men baqylaýy kúsheıtiledi;

- memlekettik qoldaý sharalarynyń tıimdiligine taldaý júrgiziledi», - dedi mınıstr.

Bul rette, Erulan Jamaýbaev Úkimet basshysy Asqar Mamınnen barlyq memlekettik organdar men baǵdarlama operatorlaryna osy jyldyń 1 naýryzyna deıingi merzimde memlekettik jáne salalyq baǵdarlamalardyń kórsetkishteri men nysanaly ındıkatorlary bóliginde Memlekettik qoldaý sharalarynyń tıimdiligin monıtorıngileý ádistemesine usynystar engizýdi, aı saıyn Qarjy mınıstrligine memlekettik qoldaý sharalaryn iske asyrý jónindegi tıisti aqparat berýdi qamtamasyz etýdi tapsyrýdy ótindi.

«Osy sharalardyń barlyǵy Memleket bsshysynyń tapsyrmalaryn jáne jańa bastamalardy qarjylandyrý úshin qosymsha resýrstardy anyqtaýǵa, sondaı-aq bıýdjettik josparlaýdyń sapasyn arttyrýǵa múmkindik beredi», - dedi mınıstr.