Memorgandar qyzmetterin «elektrondyq úkimetke» berýden nege qashady

ASTANA. QazAqparat -  QR Memlekettik qyzmet isteri jáne sybaılas jemqorlyqqa qarsy kúres agenttiginiń memlekettik qyzmetter departamentiniń dırektory Ádilbek Muqashevtiń aıtýynsha, ortalyq memlekettik organdar óz aqparattyq júıelerin "elektrondyq úkimetpen" ıntegratsııalaýǵa asyqpaıdy. Sebebi "burynǵy tártipti" buzǵysy kelmeıdi, dep xabarlaıdy QazAqparat tilshisi.

"Sóıtip, memlekettik qyzmetterdiń ashyqtyǵyn qamtamasyz etýden qashady. Al sebebine kelgende bárin qarjynyń tapshylyǵyna jaba salady", - dedi Muqashev memlekettik qyzmetterdi avtomattandyrý máselelerine arnalǵan jıynda.

Agenttiktiń málimetine sáıkes, búginde reestrge kiretin 623 memlekettik qyzmettiń tek 4,3 paıyzy ǵana tolyǵymen avtomattandyrylyp, "elektrondyq úkimet" portaly arqyly usynylady. 63,7 paıyzynda alternatıvti qyzmet túrleri saqtalǵan. Al memlekettik qyzmetterdiń 4,9 paıyzy áli kúnge deıin qaǵaz júzinde usynylady. "Agenttiktiń saraptamasyna sáıkes, qazirdiń ózinde memlekettik organdar 34 qyzmetti tolyǵymen avtomattandyrýǵa daıyn. Degenmen, memlekettik organdardyń aqparattyq júıelerin ıntegratsııalaý sharalary baıaý júrgizilýde. Osy saladaǵy jumys 2003 jyly bastalǵanyn eskersek, 14 jyldyń ishinde memlekettik organdardyń aqparattyq júıelerin "elektrondyq úkimet" portalyna qosý jumysy tek 12 paıyzǵa ǵana oryndaldy. Bul degenimiz, 50 aqparattyq júıe ıntegratsııalandy. Qazirgi kezde 60 vedomstvonyń aqparattyq júılerin ıntegratsııalaý asa qajet. Sebebi olardyń qyzmetteri xalyq tarapynan joǵary suranysqa ıe", - deıdi agenttiktiń memlekettik qyzmetter departamentiniń dırektory Ádilbek Muqashev.

Osy saladaǵy taǵy bir mańyzdy másele - ortalyq memlekettik organdar áli kúnge deıin 39 qyzmetti qaǵaz júzinde usynyp keledi. Ony alý úshin Astanaǵa kelý kerek. "Máselen, jeńil ónerkásip, taý-ken, xımııa men aǵash ónerkásibi salasyndaǵy taýarlardy óńdeý sharttary týraly qujatty Investıtsııalar jáne damý mınıstrliginiń ózinen alý qajet. Oǵan 20 kún ketedi. Sonda mınıstrlik mamandary barlyq qujattardy qaraıdy da, jańaǵy ruqsatty bere salady. Al atalǵan qyzmet jergilikti jerge berilse, barlyq jumysty bir-eki kúnniń ishinde bitirýge bolady", - dep atap kórsetti Muqashev.

Búginde QR Memlekettik qyzmet isteri jáne sybaılas jemqorlyqqa qarsy kúres agenttigi arnaıy jumys tobyn qurýdy usynyp otyr. Atalǵan top QR Aqparat jáne kommýnıkatsııalar mınıstrligi janynda jumys istep, aqparattyq júıelerdiń ıntegratsııasyn qatań baqylap otyrýy qajet.