Memlekettik tildegi tele jáne radıobaǵdarlamalar kólemin 60%-ǵa deıin ulǵaıtý kózdelip otyr - Senat
Bul týraly Senattyń baspasóz qyzmeti habarlady.
«Mass-medıa týraly» jáne oǵan ilespe «Qazaqstan Respýblıkasynyń keıbir zańnamalyq aktilerine mass-medıa máseleleri boıynsha ózgerister men tolyqtyrýlar engizý týraly» zańdar memlekettik emes buqaralyq aqparat quraldaryna grant berý arqyly memlekettik aqparattyq saıasatty qarjylandyrý tetikterin jetildirý, jarııalanǵan materıalǵa talap qoıýdyń eskirý merzimin bir jylǵa belgileý, memlekettik tildegi tele jáne radıobaǵdarlamalar kólemin 50%-dan 60%-ǵa deıin ulǵaıtý jáne sheteldik baǵdarlamalardy retranslıatsııalaý úlesin 20%-dan 10%-ǵa deıin tómendetý kózdelip otyr. Sonymen qatar qoǵamnyń adamgershilik turǵysynda damýyna zııan keltirý men jalpy adamzattyq, ulttyq, mádenı jáne otbasylyq qundylyqtarǵa nuqsan keltirýge oraı zańdardaǵy jańalyqtarda ýákiletti organnyń quzyretine buqaralyq aqparat quraldarynyń monıtorıngi jónindegi fýnktsııalar engizý, sondaı-aq jýrnalıstiń kásibı qyzmetiniń quqyqtyq kepildikterin qamtamasyz etý jáne BAQ saýaldaryn qaraý merzimderin 7-den 5 jumys kúnine deıin qysqartý da bar.
Parlamentshiler sonymen qatar «Qazaqstan Respýblıkasynyń Ákimshilik quqyq buzýshylyq týraly kodeksine mass-medıa máseleleri boıynsha ózgerister engizý týraly» zańdy da qarady. Zań ákimshilik quqyq buzýshylyq týraly kodekstiń keıbir normalaryn «Mass-medıa týraly» zańnyń erejelerine sáıkes keltirý maqsatynda ázirlengen bolatyn. Atap aıtqanda, aqparattyq habar taratý sapasyn qamtamasyz etýdi jáne medıa kontentti retteý salasyndaǵy zańnamalyq sharalardy nyǵaıtýdy kózdeıtin ózgerister engiziledi.
Senatorlardyń aıtýynsha, zańdardy qabyldaý normatıvtik bazany tujyrymdamalyq turǵyda qalyptastyrýǵa múmkindik beredi jáne buqaralyq ulttyq zańnama men aqparat quraldaryna quqyq qoldaný tájirıbesin odan ári jetildirýge yqpal etedi.
Komıtet músheleri talqylaý qorytyndysy boıynsha zańdardy Palata otyrysyna qaraýǵa jiberý týraly sheshim qabyldady.