Memlekettik satyp alýdyń ashyqtyǵy bıznes pen azamattarǵa tıimdi

<p>ÓSKEMEN. KAZINFORM — Memlekettik satyp alý — jańashyldyqtardy, ozyq tehnologııalar men otandyq óndiristi ilgeriletýge yqpal etetin tıimdi tetik. Osyǵan oraı Qarjy mınıstrligi óńirlerde «Memlekettik satyp alý týraly» Zańdaǵy negizgi ózgeristerdi túsindirýge arnalǵan bıznes ókilderimen, memlekettik sektormen jáne azamattyq qoǵam ókilderimen kezdesýler ótkizýdi jalǵastyryp keledi.</p>

Bul joly kezekti kezdesý Óskemende ótkizilip, Qarjy vıtse-mınıstri Dáýren Keńbeıl men Shyǵys Qazaqstan oblysy ákiminiń orynbasary Darhan Sapanov memlekettik satyp alý arqyly otandyq taýar óndirýshilerdi qoldaý túrleri týraly aıtyp berdi. Іs-sharaǵa Shyǵys Qazaqstan men Abaı oblystarynyń bıznes qaýymdastyǵy, sondaı-aq memlekettik organdardyń, bıýdjettik uıymdardyń, ShOB pen «Atameken» UKP óńirlik fılıalynyń ókilderi qatysty.

Foto: Qarjy mınıstrliginiń baspasóz qyzmeti

Dáýren Maratuly atap ótýinshe, Memleket basshysy Qazaqstan halqyna Joldaýynda otandyq bıznestiń sapaly damýyn yntalandyryp, qoldaýdy tapsyrǵan bolatyn. Osy turǵydan alǵanda «Memlekettik satyp alý týraly» Zań atalǵan mindetti oryndaýdaǵy mańyzdy qural sanalady.

«Memlekettik satyp alýdyń ashyq jáne jaqsy uıymdastyrylǵan júıesi protsestiń barlyq múddeli tarabyna, onyń ishinde memlekettik sektorǵa, bıznes pen azamattarǵa tıimdi. Óıtkeni bul básekelestiktiń artýyna jáne kórsetiletin qyzmetter men taýarlardyń sapasyn jaqsartýda septigi zor. Mysaly, satyp alýǵa qatysýshylardyń biliktiligin arttyrý úshin tıisti bedeli bar óndirýshiler arasynda satyp alýdy júzege asyrý usynylady. Óndirýshi týraly aqparat túrli derekqorlardy paıdalana otyryp qalyptastyrylady. Bul qyzmet kórsetýshilerdi avtomatty túrde tańdaýǵa kóshýge múmkindik beredi», — dedi Qarjy vıtse-mınıstri.

Budan basqa otandyq taýar óndirýshilerdi qoldaý maqsatynda Qarjy mınıstrligi tek shaǵyn jáne orta kásipkerlik sýbektilerinen satyp alynatyn taýarlardyń, jumystar men kórsetiletin qyzmetterdiń jekelegen tizbesin bekitti.

Zańnyń birneshe bólimi satyp alý protsedýrasyn jeńildetýge baǵyttalǵan. Bul olardy qysqa merzimde ótkizýge múmkindik beredi. Budan bólek tapsyrys berýshilerdiń joǵary talaptardy belgileý faktilerin boldyrmaý maqsatynda qoldanystaǵy kameraldy baqylaýdy saqtaý josparlanǵan. Bul rette ýákiletti organ tarapynan satyp alý qorytyndylarynyń kúshin joıý quqyǵy alynyp tastalǵan.

Mundaı kezdesýler mınıstrliktiń isker ortamen ózara is-qımyldy nyǵaıtý men barlyq múddeli tarap úshin qoljetimdi aqparatty qamtamasyz etý jónindegi strategııasynyń mańyzdy bóligi bolyp sanalady. Vedomstvo Qazaqstan ekonomıkasyn damyta otyryp, memlekettik satyp alý júıesiniń tıimdiligin arttyrý men ózekti máselelerdi birlesip sheshý úshin kásipkerlermen, iri bıznes ókilderimen jáne qoǵamdyq birlestiktermen júıeli dıalog ornatýdy jalǵastyryp keledi.