Memlekettik orman sharýashylyqtaryndaǵy órt sóndirýshi mashınalardyń 72%-y eskirgen
«Orman sharýashylyǵy mekemelerine qarasty órt sóndirý stantsııalarynda 1259 órt sóndirýshi jumys isteıdi. Qazirgi kezde órt sóndirý stantsııalaryn materıaldyq-tehnıkalyq jabdyqtaý jumystary júrgizilip jatyr. Úkimet tabıǵat qorǵaý uıymdaryn materıaldyq-tehnıkalyq jaraqtandyrýdy nyǵaıtý jónindegi 2023-2027 jyldarǵa arnalǵan, jalpy qarjylandyrý kólemi 68,6 mlrd teńgeden asatyn keshendi jospardy qabyldady. Byltyr mınıstrliktiń tabıǵatty qorǵaý uıymdary úshin 9 mlrd teńgeden astam qarjy bólindi. 25 órt sóndirý avtomashınasy, 51 shaǵyn orman órti kesheni, 154 traktor, 73 patrýldik avtomashına jáne 655 birlik órtke qarsy jabdyq (dıskili tyrmalar, soqalar, tirkemeler jáne basqalar) satyp alyndy. Atalǵan sharalar mınıstrliktiń tabıǵatty qorǵaý mekemeleriniń jaraqtandyrylýyn 57-den 71%-ǵa deıin ulǵaıtýǵa múmkindik berdi», - dep jazylǵan mınıstrlik málimetinde.
Sondaı-aq, jergilikti ákimdikter jalpy somasy 6,6 mlrd teńgege 20 órt sóndirý avtomashınasyn, 127 traktordy jáne 76 patrýldik mashınany satyp alǵan kórinedi.
«Bul rette orman sharýashylyqtarynyń jaraqtandyrylýy 75-ten 79%-ǵa deıin ulǵaıtyldy. Barlyq memlekettik orman ıeleri boıynsha jaraqtandyrýdyń artýyna qaramastan, qolda bar tehnıkanyń tozý paıyzy joǵary bolyp otyr jáne órt sóndirý mashınalary boıynsha 72%, traktorlar boıynsha 50% jáne patrýlder boıynsha 55%. Osy jylǵa azamattyq qorǵaý salasyndaǵy birinshi kezektegi sharalardyń keshendi jospary sheńberinde 16,7 mlrd teńge, onyń ishinde ekologııa mınıstrligi úshin 9,1 mlrd teńge jáne jergilikti atqarýshy organdar úshin 7,6 mlrd teńge josparlanǵan. Mınıstrliktiń 2024 jylǵa arnalǵan bıýdjetin qalyptastyrý kezinde materıaldyq-tehnıkalyq jaraqtandyrýǵa 5,4 mlrd teńge bólindi», - delingen jaýapta.