Memlekettik organdar zań jobalaý jumysyn nashar josparlaǵan – mınıstr

<p>QR Ádilet mınıstri Azamat Esqaraev Úkimettiń 2023 jylǵa arnalǵan zań jobalaý jumystary josparynyń qalaı oryndalǵanyn qorytyndylady, dep habarlaıdy Kazinform.</p>

2023 jylǵa arnalǵan Úkimettiń zań jobalaý jumystary jospary Parlament Májilisine 32 zań jobasyn ázirleýdi jáne engizýdi kózdegen.

«Jyl ishinde bul josparǵa 7 ózgeris engizildi. 4 zań jobasy boıynsha engizý merzimderi aýystyryldy, memlekettik-jekeshelik áriptestik máseleleri boıynsha zań jobasy alyp tastaldy jáne 8 jańa joba tolyqtyryldy. Qazirgi ýaqytta 32 jobanyń beseýine Memleket basshysy qol qoıdy, 20-sy Parlamenttiń qaraýynda, 5-eýi Úkimettiń qaraýynda, ekeýi memlekettik organdarynyń kelisýinde», - dedi A. Esqaraev Úkimettiń qorytyndy otyrysynda.

Óz kezeginde, mınıstrlikterdiń qaıta qurylýyna, sondaı-aq bıznes-qoǵamdastyqpen tujyrymdamalyq máselelerdi pysyqtaýǵa baılanysty Sý jáne Qurylys kodeksteriniń jobalary boıynsha jumys jalǵasýda.

«Memlekettik organdardyń zań jobalaý jumysyn nashar josparlaǵanyna nazar aýdarǵym keledi, onyń nátıjesi – merzimderiniń jıi ózgerýi jáne jospardan alyp tastaý bolyp otyr. Mysaly, Sý kodeksiniń josparǵa sáıkes engizý merzimderi eki ret túzetilip, Úkimetke merzimi buzylyp engizildi. Budan basqa, jospardan tys 18 zań jobasy ázirlendi, 70-ke jýyq jekelegen túzetý toptamasyna bastama jasaldy, bul zań jobalaý jumysynnyń tıisti josparlaýdyń bolmaǵanyn kórsetedi.

Joǵaryda aıtylǵandardy eskere otyryp, Álıhan Ashanuly, memlekettik organdarǵa zań jobalaý jumysyn josparlaý kezinde boljamdy-taldamalyq jumysty kúsheıtýdi tapsyrýdy suraımyn», - dep synǵa aldy Ádilet mınıstri.