Memlekettik organdar halyqqa resmı aqparatty jedel jetkizýge mindetti – zań jobasy

<p>ASTANA. KAZINFORM &ndash; Búgin Parlament Májilisinde &laquo;Qazaqstan Respýblıkasynyń keıbir zańnamalyq aktilerine aqparatqa qol jetkizý jáne qoǵamdyq qatysý máseleleri boıynsha ózgerister men tolyqtyrýlar engizý týraly&raquo; zań jobasynyń tanystyrylymy ótti.</p>

Zań jobasynyń maqsaty – halyqtyń habardar bolýyn, memlekettik sektordyń ashyqtyq deńgeıin, belsendiligi men esep berýin arttyrý.

«Zań jobasyn iske asyrý bıýdjetten qosymsha qarjy shyǵyndaryn talap etpeıdi. Qujat halyqaralyq saraptama uıymdarynyń, qazaqstandyq úkimettik emes uıymdardyń, sondaı-aq Adam quqyqtary jónindegi ulttyq ortalyqtyń qatysýymen ázirlendi. Bul turǵyda tıisti máselelerdi sheshý maqsatynda usynystar engizildi. Halyqaralyq ashyqtyq standartyn qoldaný maqsatynda Aqparatqa qol jetkizý týraly zań aıasynda, ıaǵnı jekelegen jaǵdaılardy qospaǵanda (memlekettik qupııalar), memlekettik organdardyń barlyq aqparatyn ashyq dep aıqyndaý usynyldy. Bul rette, memlekettik organdar aqparatqa qol jetkizýdi tek belgili bir merzimge jáne qujattyń bir bóligine ǵana shekteý qoıýǵa quqyly bolady», - dedi Mádenıet jáne aqparat vıtse-mınıstri Danııar Qadyrov.

Onyń aıtýynsha, zań jobasyna sáıkes memlekettik organdar halyqqa resmı aqparatty óz bastamasymen jedel jetkizýge mindetti. Osy maqsatta memlekettik organdardyń aqparatty belsendi túrde taratýǵa qatysty jańa mindeti, sondaı-aq onyń uǵymy men iske asyrý tetigi engiziledi. Bul, birinshi kezekte, bilim berý, ekologııa jáne densaýlyq saqtaý salalaryna qatysty.

Sonymen qatar vıtse-mınıstr múgedektigi bar adamdar úshin aqparatty emin-erkin alýyi máselelerin Aqparatqa qol jetkizý týraly zańda jeke bap jáne qaǵıdat túrinde bekitý usynylǵanyn aıtty.

Budan bólek, depýtattyq belsendiliktiń jáne Parlament depýtattary bastamasymen ázirlenetin zań jobalarynyń sanynyń ósýi baıqalyp otyr. Osyǵan oraı depýtattyq zań jobalary boıynsha «Ashyq NQA» portalynda jarııa talqylaý júrgizý usynyldy.

«Qazir Mádenıet jáne aqparat mınıstrliginiń aqparatqa qol jetkizý salasynda baqylaý ókilettikteri bolmaǵandyqtan, azamattar men BAQ-tan kelip túsetin shaǵymdar boıynsha den qoıý sharalaryn qabyldaý múmkindigi joq. Azamattar birden sotqa shaǵymdanýǵa májbúr. Sondyqtan Mádenıet jáne aqparat mınıstrligine tıisti quzyret bere otyryp, aqparatqa qol jetkizý salasyndaǵy jaýapkershilikti kúsheıtý men memlekettik baqylaýdy engizý usynyldy», - dedi D. Qadyrov.