Memlekettik marapattar júıesi 9 qurmetti ataqpen tolyqtyrylady — Prezıdent

<p>ASTANA. KAZINFORM &mdash; Memlekettik marapattar júıesi 9 qurmetti ataqpen tolyqtyrylady. Bul týraly Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev aıtty.</p>

«Men Joldaýda jumysshy mamandyq ıelerine, ónertapqyshtar men ǵalymdarǵa qurmetti ataq berýdi usyndym. Memlekettik marapattar júıesin 9 qurmetti ataqpen tolyqtyrý josparlanyp otyr. Sonyń ishinde „Qazaqstannyń agrarlyq salasynyń eńbek sińirgen qaıratkeri“ ataǵy bar. Bul — elimizdi órkendetýge ólsheýsiz úles qosqan aýyl sharýashylyǵy eńbekkerlerine shynaıy qurmettiń belgisi. Qazir depýtattar tıisti zańdarǵa ózgeris engizý máselesin qarastyryp jatyr», — dedi Prezıdent.

Memleket basshysy kelesi jyl — Jumysshy mamandyqtary jyly ekendigine nazar aýdartty. 

«Jyl boıy biz naǵyz eńbek adamdaryn joǵary deńgeıde ulyqtaıtyn bolamyz. Bul qoǵamda eńbekqorlyq pen kásibılik qundylyqtaryn dáripteý jyly bolmaq», — dedi Qasym-Jomart Toqaev.