Memlekettik kúzet qyzmeti sarbazdary áskerı ant qabyldady
Astana qalasyndaǵy «Aıbyn» prezıdenttik polki áskerı qyzmetshileriniń Áskerı ant qabyldaý rásimi «Otan qorǵaýshylar» monýmenti janyndaǵy alańda ótti, al Almaty qalasyndaǵy «Batyr» prezıdenttik polki sarbazdarynyń osyndaı saltanaty 28 gvardııashy-panfılovshylar saıabaǵynda boldy. Áskerı ant qabyldaý saltanatyna jas sarbazdardyń ata-analary men jaqyndary qatysty.
QR MKQ qataryna 2024 jylǵy kóktemde shaqyrylǵan merzimdi áskerı qyzmet sarbazdary elimizdiń barlyq aımaqtary men respýblıkalyq mańyzy bar qalalarynan iriktelip alynǵan. Olar áskerı bólimderdiń dalalyq oqý ortalyqtarynda jańa shaqyrylym sarbazdaryn daıyndaý kýrsynan ótti.
Áskerı ant qabyldaý saltanaty – erekshe jaýyngerlik rásimderdiń biri. Ant qabyldaý arqyly sarbazdar ózderine Otandy qorǵaýǵa ázir bolýǵa, áskerı qyzmet mindetterin adal atqarýǵa jaýapkershilik alady.
QR MKQ áskerı bólimderinde merzimdi qyzmet atqarý barysynda jas sarbazdar tájirıbeli nusqaýshylyq quramnyń jetekshiligimen áskerı iske úırenedi, jaýyngerlik jáne arnaıy daıarlyq sabaqtarynda áskerı mamandyqtardy meńgeredi.
Áskerı ant qabyldaǵan soń merzimdi qyzmet sarbazdary QR MKQ Aıryqsha maqsattaǵy kúshteri atqaratyn: Qazaqstan Respýblıkasynyń Memlekettik Týy men Memlekettik Eltańbasy etalondaryn kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý sekildi mindetterdi atqarýǵa kirisedi.
QR Memlekettik kúzet qyzmeti Aıryqsha maqsattaǵy kúshteriniń merzimdi áskerı qyzmet sarbazdary qataryna elimizdiń 18 ben 27 jas aralyǵyndaǵy, boıy 180 sm-den joǵary jáne 195 sm-den aspaıtyn, bilimi orta bilimnen tómen emes, densaýlyǵy jaqsy kez kelgen azamaty qosyla alady. Joǵary bilimdi, sporttyq jetistikteri men razrıadtary bar úmitkerlerge basymdyq beriledi.
Merzimdi áskerı qyzmetti QR Memlekettik kúzet qyzmeti qatarynda atqarý jas azamattar úshin myqty erlik mektebi bolady, olar munda óziniń ómirlik jolyna qajetti mańyzdy daǵdylarǵa úırenedi. Jastar úshin bul kezeń ary qaraıǵy mansap jolyn jalǵastyrýǵa negiz, áleýmettik lıft bolýy múmkin. Merzimdi áskerı qyzmetti aıaqtaǵandar qalaýy boıynsha qyzmetti kelisimshart negizinde jalǵastyra alady, odan ári olardyń arnaýly memlekettik organnyń qyzmetkeri jáne ofıtseri bolyp, kúzetiletin tulǵalar men obektilerdiń qaýipsizdigin qamtamasyz etý boıynsha mindetterdi atqarý múmkindigi bar.
Sonymen qatar QR MKQ merzimdi qyzmet sarbazdary úshin merzimdi áskerı qyzmet atqarǵan azamattardy áleýmettik qoldaý boıynsha Qazaqstan Respýblıkasynda belgilengen barlyq jeńildikter qoldanylady.