Memqyzmetshilerge syıaqy berýge tyıym salatyndaı negiz joq – Qarjy mınıstrligi

<p>ASTANA. KAZINFORM &ndash; QR Qarjy mınıstrligi memlekettik qyzmetshilerge syıaqy berýge baılanysty ótinishterdiń kóptep túsýine baılanysty jaǵdaıdy <a href="https://www.gov.kz/memleket/entities/minfin/press/news/details/877035?lang=kk" target="_blank" rel="noopener">túsindirdi</a>.</p>

«Qazaqstan Respýblıkasy Úkimetiniń 2001 jyldyń 29 tamyzyndaǵy №1127 qaýlysyna sáıkes memlekettik qyzmetshilerge syıaqy tóleý, materıaldyq kómek kórsetý, laýazymdyq aılyqaqylaryna ústemeaqylar belgileý bıýdjet qarajatyn únemdeý esebinen ǵana júzege asyrylady. Osy qaýly arqyly shyǵys baptarynyń naqty tizbesi aıqyndalǵan. Olardyń esebinen únemdeý qalyptasqan jaǵdaıda ǵana syıaqy tólenýi múmkin (issaparlarǵa, kommýnaldy jáne kólik qyzmetterine, baılanys qyzmetterine, úı-jaılardy jalǵa alýǵa jáne t.b. shyǵystar boıynsha únemdeý). Búginde atalǵan qaýlyǵa, sondaı-aq basqa da zańnamalyq aktilerge syıaqylardy shekteıtin ózgerister engizilmegendikten memlekettik qyzmetshilerge syıaqylardy berýge tyıym salatyndaı negiz joq»,-delingen mınıstrliktiń habarlamasynda.

Qarjy mınıstrliginiń osyǵan deıingi habarlamasynda Úkimet qaýlysynyń normalaryn buljytpaı ustaný qajettigi jáne baǵdarlama ákimshileriniń qyzmetkerlerdi tizbede kórsetilgenderden bólek bıýdjettik baptardan qarajatty syıaqyǵa paıdalanýǵa jol bermeý týraly aıtylǵan bolatyn. Sebebi ınvestıtsııalyq jobalardy iske asyrýdan jáne/nemese memlekettik apparattyń jumysyna áser etpeıtin materıaldyq aktıvterdi satyp alýdan únemdelgen qarajat bıýdjetke qaıtarylýǵa tıis.

Aıta keteıik, osyǵan deıin Qarjy vıtse-mınıstri Mádı Takıev Májilistiń jalpy otyrysynan keıin BAQ ókilderiniń saýalyna jaýap bere turyp Qazaqstanda memlekettik qyzmetshilerge únemdelgen bıýdjet qarjysy syıaqy túrinde berilmeıtini týraly aıtqan bolatyn.

Keıinirek Prezıdent keńesshisi, burynǵy Qarjy mınıstri Erulan Jamaýbaev osy máselege qatysty pikir bildirdi.

«Qarjy mınıstrliginiń jaýapty hatshysy, Qarjy mınıstri bolyp jumys istedim. Bul jerde anyqtap ketetin másele bar. Eger bıýdjette syıaqyǵa qarajat kózdelgen bolsa, onda ony eshkim alyp qoımaıdy. Syıaqy retinde beriledi. Degenmen, memlekettik organdar satyp alý protsesin júrgizgende únem bolady. Sol únemdi Qarjy mınıstrligi syıaqy retinde bermeý týraly sheshim qabyldap otyr. Biraq ol áli zańdastyrylmaǵan. Qazynalyq shot bar. Sodan bir-birine aýdarýǵa bóget qoımaqshy. Árıne, ózimde bilemin, qanshama adam memlekettik qyzmette. Qarapaıym qyzmetkerlerge aýyr tıedi. Odan ózim de ótkenmin. Sondyqtan durys sheshim qabyldaý qajet», - dedi Erulan Jamaýbaev.