Memlekettik keńesshi mekteptegi tárbıe jóninde jıyn ótkizdi
20:46, 14 Qarasha 2024
<p>ASTANA. KAZINFORM - Qazaqstan Respýblıkasynyń Memlekettik keńesshisi Erlan Qarınniń tóraǵalyǵymen mektepterdegi tárbıe jumysy jóninde keńes ótti. Oǵan memlekettik organdardyń ókilderi jáne «Birtutas tárbıe» baǵdarlamasyn ázirlegen jumys tobynyń músheleri qatysty, dep habarlaıdy Aqorda.</p>
Atalǵan qujat Memleket basshysynyń Ulttyq quryltaıdyń «Adal adam – Adal eńbek – Adal tabys» atty úshinshi otyrysynda bergen tapsyrmasyna sáıkes daıyndaldy. Bul baǵdarlama bilim berý uıymdaryna bıylǵy 1 qyrkúıekten engizile bastady.
Memlekettik keńesshi tárbıe jumystaryn uıymdastyrý mektep pen ata-analardan kúsh jumyldyrýdy talap etetin kúrdeli úderis ekenin atap ótti. Baǵdarlama otanshyldyq, jaýapkershilik, eńbekqorlyq, yntymaqtastyq, jasampazdyq pen jańashyldyq sekildi irgeli qundylyqtardy keńinen dáriptep, óskeleń urpaqtyń boıyna sińirýdi kózdeıdi.
Jıyn sońynda Erlan Qarın barlyq bilim berý mekemesinde tárbıe jumysynyń jańa baǵdarlamasyn tıimdi júzege asyrýǵa jáne ony odan ári ilgeriletýge qatysty naqty tapsyrmalar berdi.