Memlekettik keńesshi Azııadaǵy ózara is-qımyl jáne senim sharalary jónindegi keńeske múshe elderdiń Volonterler sletine qatysty

<p>ASTANA. KAZINFORM &ndash; 3-4 qazan kúnderi Astana qalasynda Azııadaǵy ózara is-qımyl jáne senim sharalary jónindegi keńeske múshe elderdegi Eriktiler qozǵalysy kóshbasshylarynyń sleti ótti. Basqosý atalǵan uıymnyń Jastar keńesiniń bastamasymen uıymdastyryldy. Alqaly jıynǵa Ázerbaıjan, Iran, Qyrǵyzstan, Qytaı, Ózbekstan, Reseı, Taıland, Tájikstan, Shrı-Lanka sekildi álemniń 21 elinen 450-den astam delegat keldi. Bul týraly Bul týraly Aqordanyń baspasóz qyzmeti málim etti.&nbsp;</p>

Slettiń plenarlyq sessııasyna Qazaqstan Respýblıkasynyń Memlekettik keńesshisi Erlan Qarın, Azııadaǵy ózara is-qımyl jáne senim sharalary jónindegi keńestiń Bas hatshysy Qaırat Sarybaı, Mádenıet jáne aqparat mınıstri Aıda Balaeva jáne shet elderdegi eriktiler uıymdarynyń jetekshileri qatysty.

Erlan Qarın óz sózinde Memleket basshysynyń volonterler qyzmetine, olardyń áleýmettik ádildikti nyǵaıtýdaǵy, birlik pen yntymaqtastyq sekildi negizgi qundylyqtardy ilgeriletýdegi róline basa mán beretinin atap ótti.

Sondaı-aq Memlekettik keńesshi Qazaqstandaǵy eriktiler qozǵalysynyń aýqymy zor ekenin, qazirgi tańda elimizde 740 volonterlik uıym tabysty qyzmet atqaryp, jańa minez-qulyq mádenıetin qalyptastyryp jatqanyn aıtty. Budan bólek, Erlan Qarın Qazaqstan volonterleriniń halyqaralyq eriktiler qozǵalysyn damytýǵa qosqan úlesine toqtalyp, olar BUU-nyń, ıÝNISEF-tiń eriktiler baǵdarlamasy men ózge de halyqaralyq is-sharalardy júzege asyrýǵa atsalysyp júrgenine nazar aýdardy.

Slet delegattary jan-jaqty pikir almasyp, túrli bastamalar men usynystar aıtty. Sondaı-aq jıynda volonterlik qyzmetke qatysty mańyzdy máseleler men onyń ornyqty damý maqsattaryna qol jetkizý jolyndaǵy róli talqylandy.

Plenarlyq sessııa sońynda Azııadaǵy ózara is-qımyl jáne senim sharalary jónindegi keńestiń aýmaǵynda volonterlikti birlesip damytýǵa qatysty usynymdar ázirlendi. Sonymen qatar Volonterlerdi mobılızatsııalaýdyń halyqaralyq jylyn ótkizý týraly usynystar aıtyldy.

Jalpy, AÓSShK Volonterler sleti bilim men tájirıbe almasýdyń biregeı alańyna aınalyp, Azııadaǵy eriktiler qozǵalysyn damytý jolyndaǵy taǵy bir mańyzdy qadam boldy.