Memlekettik kásiporyndardy basqarý saıasaty jetildiriledi

<p>ASTANA. KAZINFORM &ndash; Memlekettik kásiporyndar jeke sektormen básekelespeýge tıis. Bul týraly Úkimet otyrysynda Memleket basshysynyń Joldaýyn iske asyrý jónindegi jalpyulttyq is-sharalar josparynyń jobasyn tanystyrǵan Premer-Mınıstrdiń orynbasary &ndash; Ulttyq ekonomıka mınıstri Nurlan Baıbazarov aıtty.</p>

«Investıtsııalyq ahýaldy jáne bıznesti júrgizý jaǵdaılaryn jaqsartý úshin qoldanystaǵy qoldaý sharalaryna revızııa júrgizý; jeke kásipkerlik sýbektilerin tekserýdi retke keltirý; halyqaralyq qarjy uıymdarynyń qatysýymen aýqymdy memlekettik-jekeshelik áriptestik jobalarynyń pýlyn aıqyndaý josparlanýda. Taǵy bir basym mindet – memlekettik kásiporyndardy basqarý saıasatyn jetildirý. Olar jeke sektormen básekelespeýge tıis. Zańnamalyq deńgeıde olardy qurý maqsattary aıqyndalady, jumys formaty reglamentteledi», - dedi Nurlan Baıbazarov.

Sondaı-aq onyń sózine qaraǵanda, aktıvterdi qaıtarý jónindegi zańnamaǵa túzetýler engizý boıynsha jumys aıasynda olardy erikti negizde qaıtarý, sondaı-aq el ekonomıkasyna ınvestıtsııa salý jolymen qaıtarý tetikteri pysyqtalady.

«Agroónerkásip jelisi boıynsha qoljetimdi kredıtteý kólemin ulǵaıtý, memlekettik sýbsıdııalardyń paıdalanylýyn baqylaýdy kúsheıtý, sondaı-aq jer ýchaskelerin qaıtarý rásimin jeńildetý sııaqty jekelegen sharalar qabyldanady. «Aýyl amanaty» jobasy aıasynda aýyl turǵyndary óndirgen ónimdi qaıta óńdeý jáne ótkizý ınfraqurylymyn jasaý, jańa qural – «taýar nesıesin» engizýge múmkindik jasaý, sondaı-aq azamattardy ónimdi aýyl sharýashylyǵy daqyldaryn ósirý boıynsha oqytý ortalyqtaryn iske qosý jónindegi sharalar kózdeletin bolady», - dedi ol.