Memlekettik departament ókili Sırııadaǵy jaǵdaıǵa qatysty AQSh ustanymyn aıtty

<p>ASTANA. KAZINFORM &ndash; AQSh Memlekettik departamentiniń baspasóz hatshysy Mettıý Mıller Sırııanyń ishindegi túrli uıymdarmen tikeleı jáne janama túrde kelissózder júrgizilip jatqandyǵyn málimdedi. Sonyń ishinde &laquo;Haııat Tahrır ash-Sham&raquo; uıymy da bar.</p>

Amerıka Qurama Shtattary BUU Qaýipsizdik Keńesiniń 2254 qararyna sáıkes Sırııadaǵy bıliktiń beıbit jolmen aýysýyn qoldaıdy.

Memlekettik hatshynyń saıası máseleler jónindegi orynbasary Djon Bass pen Memlekettik hatshynyń Taıaý Shyǵys isteri jónindegi kómekshisi Barbara Lıf qazir aımaqtaǵy negizgi seriktestermen keńesip jatyr. Al Memlekettik hatshy Entonı Blınken sol aımaqtaǵy basty oıynshylarmen kelissózderdi jalǵastyrýda. 

AQSh Sırııanyń ishki jaǵdaıynda qandaı da bir qaýip-qater tónse, memlekettiń kórshilerine, sonyń ishinde Iordanııaǵa, Lıvanǵa, Irakqa jáne Izraılge qoldaý kórsetýdi jalǵastyrady. 
Amerıka «Irak jáne Levant Islam memleketi» (IGIL) uıymyna (Qazaqstanda tyıym salynǵan uıym – red.) qarsy mıssııasyn jalǵastyrady jáne olardyń bul jaǵdaıdy AQSh múddelerine qaýip tóndiretin lańkestik áreketterdi qaıta bastaý úshin paıdalanýyna jol bermeıdi.

Memlekettik departament ókili AQSh-tyń salǵan sanktsııalary Sırııa rejımin álsiretkenin atap ótti. Sondaı-aq Bashar Asadtyń jaqtastary AQSh-tyń dıplomatııalyq jáne áskerı kúsh-jigerinen álsiregenin, bul da bolǵan oqıǵaǵa óz septigin tıgizgenin málimdedi. 

«Sırııa qazirgi ýaqytta ótpeli kezeńde turǵan memleket. Meniń oıymsha, biz bárimiz osy qubylmaly sátte úkim shyǵarýǵa asyqpaýymyz kerek», - dedi Metıý Mıller.