Memlekettik bıýdjetke 18,2 trln teńge tústi – mınıstr

<p>Jyl basynan beri jergilikti bıýdjetterge túsken kirister jospardan asyra oryndaldy. Bul týraly QR Qarjy mınıstri Erulan Jamaýbaev aıtyp berdi, dep habarlaıdy <a href="Kazinform" target="_blank" rel="noopener">Kazinform</a>.</p>

«Memlekettik bıýdjetke túsken kirister somasy 18,2 trln teńgeni qurady nemese jospar 98,6%-ke oryndaldy. Respýblıkalyq bıýdjetke 12,6 trln teńgege jýyq qarjy tústi. Jospar 94,4%-ke oryndaldy», - dedi Erulan Jamaýbaev Úkimettiń búgingi otyrysynda.

Qarjy mınıstri jospardyń oryndalmaýy negizinen salyqtarǵa tıesili ekenin atap ótti. Atap aıtqanda, korporatıvtik tabys salyǵy, ımportqa salynatyn qosylǵan qun salyǵy, paıdaly qazbalardy óndirýge salynatyn salyq jáne shıki munaıǵa eksporttyq keden bajy yqpal etken.

«Korporatıvtik tabys salyǵy boıynsha jospardyń oryndalmaýy 272 iri salyq tóleýshi boıynsha málimdelgen avanstyq tólemder somasynyń 24% azaıýymen baılanysty. Importqa salynatyn qosylǵan qun salyǵy boıynsha jospardyń oryndalmaýyna taýarlardyń jekelegen toptary boıynsha ımport kóleminiń tómendeýi jáne Eýrazııalyq ekonomıkalyq odaq elderinen ımport kóleminiń 9% azaıýy sebep boldy», - dep tolyqtyrdy E. Jamaýbaev.

Paıdaly qazbalardy óndirýge salynatyn salyq boıynsha jospardyń oryndalmaýyna negizgi eksporttyq taýarlar baǵasynyń orta eseppen 12% tómendeýi áser etken.

Shıki munaıǵa eksporttyq keden bajy boıynsha jospardyń negizgi oryndalmaýy eksporttyq keden bajynyń naqty qalyptasqan mólsherlemesiniń boljamdy kórsetkishten 8%-ke tómendeýimen baılanysty boldy. Aktsııalardyń memlekettik paketine dıvıdendter esebinen salyqtyq emes túsimder asyra oryndaldy.

«Jergilikti bıýdjetterdiń kiristeri 109,2% atqaryldy jáne 5,7 trln teńgeni qurady. Jospar 478 mlrd teńgege, onyń ishinde salyqtar boıynsha 425 mlrd teńgege asyra oryndaldy. Almaty oblysynan basqa barlyq óńirlerde kirister boıynsha josparlar asyra oryndaldy», - dedi E. Jamaýbaev.