Memlekettik basqarýdyń sapaly jumys isteýi ókiletti jáne atqarýshy organdardyń qarym-qatynasyna baılanysty – Báımenov
«Sarapshylar HHІ ǵasyrdyń basynan bastap VUCA dep, al qazir BANI álemi dep atalatyn qubylmaly, kúrdeli zamanda memlekettik basqarý sapasynyń mańyzy artyp keledi. Endeshe búgingi basqosýdyń taqyryby da óte ózekti. Qazaq «ılegenimiz bir teriniń pushpaǵy» degendeı, barshamyz memlekettik basqarý júıesiniń tıimdi jumys jasaýyna múddelimiz. Bul Astana memlekettik qyzmet habynyń mıssııasyna da tikeleı qatysty. 43 qatysýshy eli bar habtyń basty maqsaty – sol úkimetterdiń tıimdi memlekettik basqarý júıesin qalyptastyrý jolyndaǵy bastamalaryna qoldaý kórsetý. Osy maqsatta biz álemniń 80-nen astam uıymymen áriptestik ornattyq. Bıyldan bastap Parlamentarızm ınstıtýtymen tikeleı jumys isteı bastaǵanymyz da biz úshin óte mańyzdy. Bizdiń zertteýlerimiz kórsetkendeı, jalpy memlekettik basqarýdyń yrǵaqty, tıimdi jáne sapaly jumys isteýi edáýir deńgeıde saıası júıege, ásirese ókiletti jáne atqarýshy organdar arasyndaǵy qarym-qatynasqa baılanysty», - dedi Álıhan Báımenov.
Onyń aıtýynsha, hab gıpotezasyna sáıkes, memlekettik basqarý júıesi - dınamıkalyq kontsetrlik sferalar. Basqasha aıtqanda orystyń «matreshkasy» sekildi.
«Onyń syrtyndaǵy eń úlken júıe – saıası, eń úlken qýyrshaq», ortańǵysy ákimshilik júıe. Eń kishisi, ishkisi – ol salalyq, aımaqtyq, operatsııalyq, tehnologııalyq júıeler jáne memlekettik qyzmet. Іshki júıeler belgili bir deńgeıde óziniń tıimdiligin arttyryp, sapasyn jaqsarta alady. Biraq, óse kele olar syrtqy júıelerdiń shekaralaryna kelip tireledi. Munyń sebebi mynada. Saıası júıe atqarýshy bıliktegi laýazym ıeleriniń taǵdyryn halyqtyń daýysy men jigerine baılaıdy. Endeshe, ol ynta men jigerge tikeleı áser etedi. Kezinde Alash kósemi Álıhan Bókeıhanov «ultqa qyzmet minezden» degende de birinshi kezekte ynta men jiger týraly aıtqany sózsiz. Sondyqtan da memlekettik basqarýdyń tıimdiligi týraly aıtqanda ókiletti organdardyń atqarýshy bılikti baqylaý, qadaǵalaý múmkindikterin, quziretterin mańyzdy faktor retinde atap ótý qajet», - dedi ol.
Hab basqarý komıteti tóraǵasynyń atap ótýinshe, saıası júıe, onyń ishinde parlamenttik qadaǵalaý atqarýshy bıliktiń ınstıtýtsıonaldy elastıkalyq qasıetin, ıaǵnı halyqtyń muń-muqtajyna atqarýshy bıliktiń sezimtaldyǵyn qalyptastyrady.
«Prezıdent Qasym-Jomart Toqaev usynǵan «halyq únine qulaq asatyn memleket» tujyrymdamasy tolyqqandy júzege asýy úshin de parlamenttik qadaǵalaý qajet. Sebebi halyqtyń únin estý qabileti qyzmetshilerdiń kásibıligimen anyqtalsa, tyńdaýǵa degen nıet pen jiger edáýir deńgeıde halyqtyń ókiletti organdar arqyly atqarýshy bılikti qadaǵalaý múmkindigimen anyqtalady», - dedi ol.