Memlekettik basqarý akademııasy 2024 oqý jylyna qabyldaýdy bastady

<p>ACTANA. KAZINFORM - QR Prezıdentiniń janyndaǵy Memlekettik basqarý akademııasyna oqýǵa qujat qabyldaý bastaldy. Bul týraly Akademııa rektory Erlan Ábil 2024-2025 oqý jylyna qabyldaý naýqanynyń bastalýy týraly ótken brıfıngte habarlady.</p>

Oqýǵa qujattardy qabyldaý onlaın formatta Akademııanyń arnaıy aqparattyq júıesi arqyly 1 sáýirden 26 maýsymǵa deıin jalǵasady.

Spıkerdiń aıtýynsha, bıyl oqýǵa qabyldaý erejelerinde birqatar ózgeris bar.

«Halyqaralyq qatynastar», «Memlekettik saıasat» jáne «Ekonomıka» eki jyldyq baǵdarlamalary boıynsha oqý merzimi eki jyldan bir jarym jylǵa deıin qysqartyldy. Bıyl «Memlekettik basqarý» baǵdarlamasyna quqyq qorǵaý organdarynan jáne arnaıy memlekettik organdardan da úmitkerlerdi qabyldaımyz. Qabyldaý naýqanynyń jalpy merzimi 20 kúnge qysqartyldy. Qorytyndy aqparatty bıyl 5 tamyzda jarııalaýdy josparlap otyrmyz. Sonymen qatar magıstratýra baǵdarlamalary úshin suhbat kezeńin baǵalaýdyń úles salmaǵy 70%-ǵa deıin jáne doktorantýra úshin 50%-ǵa deıin kóterildi», – dedi Akademııa rektory.

Magıstrlik bilim berý baǵdarlamalary boıynsha memlekettik tapsyryspen oqýǵa túsý úshin memlekettik qyzmette keminde 2 jyl, al doktorlyq baǵdarlamalar úshin 5 jyl eńbek ótili bolýy qajet.

«Akademııada memlekettik qyzmetshilerdi daıarlaý 8 magıstratýra baǵdarlamasy jáne 3 doktorantýra baǵdarlamasy boıynsha júzege asyrylady. Sondaı-aq memlekettik qyzmetshi emes tulǵalarǵa negizgi jumysymen qatar oqýǵa bolatyn 2 modýldik baǵdarlama qarastyrylǵan. Memlekettik qyzmetshilerdi daıarlaýǵa magıstratýra boıynsha 120 grant, doktorantýra boıynsha 12 grant bólingen. Grantqa tapsyrýshylar memlekettik organnyń joldamasyn usynýy qajet. Oǵan memlekettik organ basshysy nemese apparat basshysy qol qoıýy kerek. Shetel azamattaryn eseptemegende, barlyq bilim berý baǵdarlamalaryna túsýshilerdiń memlekettik tildi meńgerýi V1 deńgeıinen tómen emes ekenin rastaıtyn QAZAQ RESMI TEST nemese QAZTEST sertıfıkaty bolýy tıis», – dep atap ótti Erlan Qýanyshuly.

Spıkerdiń málimetinshe, irikteýdiń alǵashqy kezeńi – Analıtıkalyq esse jazý 29 maýsymda naqty ýaqyt rejıminde ótedi. Doktorantýraǵa úmitkerler zertteý jumysynyń josparyn (Research proposal) 26 maýsymǵa deıin júkteýi kerek, josparlar 7 shildege deıin baǵalanady. Qorytyndy kezeń – Suhbat – 1-20 shilde aralyǵynda Akademııa qabyrǵasynda oflaın formatta ótedi. 22 shilde kúni aralyq qorytyndy shyǵarylady.