Memlekettik aýdıt: «QazMunaıGaz» aktıvteriniń ótkizilýine baqylaý kúsheıtildi

<p>ASTANA. KAZINFORM - &laquo;QazMunaıGaz&raquo; ulttyq kompanııasy QR Joǵary aýdıtorlyq palatasynyń nusqamasy sheńberinde óz aktıvterin ótkizý sharttarynyń oryndalýyna baqylaýdy kúsheıtti.</p>

Jekeshelendirý salasyndaǵy memleket saıasatynyń tıimdiligine júrgizilgen aýdıt qorytyndysy boıynsha (2023 jylǵy jeltoqsan) QMG aktıvterin satyp alý-satý sharttarynyń oryndalýyn baqylaýdyń qoldanystaǵy júıesi olardyń oryndalý talaptarynyń anyqtyǵyn qamtamasyz etpeıtini anyqtaldy. Osyǵan baılanysty ulttyq kompanııaǵa jumys normatıvterine qajetti ózgerister engizý tapsyryldy.

Nátıjesinde QMG Dırektorlar keńesiniń 2024 jylǵy 17 qyrkúıektegi sheshimimen Aktıvterdi ótkizý qaǵıdalary jańa redaktsııada bekitildi. Munda básekeles ortaǵa beriletin zańdy tulǵa qyzmetiniń beıinin, jumysshylardyń jalpy sanyn, olardyń jalaqy deńgeıin saqtaý sııaqty jáne basqa da talaptar kózdelgen.

Jańartylǵan Qaǵıdalarǵa sáıkes aktıvti ótkizýdiń barlyq talaptary mindetti túrde satyp alý-satý shartyna engizilip, odan ári olardyń oryndalýyn rastaıtyn toqsan saıynǵy, jartyjyldyq nemese jyldyq esepter usynylyp otyrýǵa tıis.

Memlekettik aýdıt qorytyndylary boıynsha basqa da tapsyrmalardyń oryndalýy Joǵary aýdıtorlyq palatanyń baqylaýynda.

Aıta keteıik, buǵan deıin Joǵary aýdıtorlyq palata QazMunaıGaz ben Báıterekke aýdıt júrgize bastaǵanyn habarlaǵan bolatynbyz.