Memlekettiń mindettemesi joq MJÁ sharttary tirkeýge alynbaı otyr - Súleımenov
«Mınıstrlik áriptestiktiń aǵymdaǵy jobalaryna taldaý júrgizip, nátıjesinde atalǵan jobalar 3 sanatqa bólindi. Atap aıtqanda, birinshisi memlekettik bıýdjetten shyǵyndardy óteýdi talap etpeıtin, ekinshisi memlekettik bıýdjetten paıdalaný shyǵyndaryn talap etetin óteýler, al úshinshisi memlekettik bıýdjetten jekeshe áriptestiń barlyq shyǵyndaryn óteýdi talap etetin jobalar»,- dedi Tımýr Súleımenov.
Onyń atap ótýinshe, shart jasalǵan memlekettik-jekeshelik áriptestiktiń 449 jobasynyń ishinen 86 joba ǵana 1-shi sanatqa jatady. Olardyń jalpy somasy 22,6 mlrd teńgeni quraıdy. Jobalardyń negizgi bóligi - 270,6 mlrd teńge somadaǵy 259 joba 2-shi sanat boıynsha jasalǵan. Al 803,1 mlrd teńge somadaǵy 104 joba 3-sanatqa jatady.
«Áriptestikti damytý úshin mynalar usynylady. Birinshiden, qazirgi ýaqytta memlekettik mindettemeler kózdelmegen sharttardy qazynashylyq organdar tirkemeı otyr. MJÁ jobalaryna ınvestorlardyń qyzyǵyn arttyrý jáne jasalǵan áriptestik sharttardyń statıstıkasyn júrgizý úshin Qarjy mınıstrligine MJÁ sharttaryn tirkeýdi qamtamasyz etý usynylady»,- dedi mınıstr.
T.Súleımenovtiń aıtýynsha, ekinshiden, Ulttyq ekonomıka mınıstrligine sapa ólshemi boıynsha baǵalaýdy engizý jáne áriptestik jobalaryn daıyndaý merzimderin baqylaý usynylady.
«Úshinshiden, salalyq memlekettik organdar men jergilikti organdar qabyldanǵan sheshimderdi, sondaı-aq áriptestik salalaryn keńeıtýdi eskere otyryp áriptestik boıynsha Jol kartalaryn jańartý usynylady. Tórtinshiden, memlekettik organdarǵa Qazaqstandyq áriptestik ortalyǵymen birlesip, áriptestik máseleleri boıynsha qyzmetkerlerdiń biliktiligin arttyrýǵa keńes beriledi»,- dedi ol.
Sonymen qatar, T.Súleımenov memlekettik-jekeshelik áriptestik tetigi júzege asyrylmaǵan salalardy atady.