Memlekettiń qyrýar qarjysy túrik pen káris serıaldarynyń ındýstrııasyna jumsalýda - mınıstr M.Qul-Muhammed

ASTANA. 11 qarasha. QazAqparat - Qazirgi kezde memleket tarapynan bólinip jatqan qarjynyń biraz bóligi sheteldik telehıkaıalarǵa jumsalyp jatady. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Mádenıet jáne aqparat mınıstri Muhtar Qul-Muhammed osy máseleni erekshe atap ótti.

Mınıstrdiń aıtýynsha, búginde sheteldik telehıkaıalardy satyp alýǵa kóp qarajat jumsalady. «Al translıatsııasyna taǵy qosymsha aqsha ketedi. Osynyń nátıjesinde memlekettiń qyrýar qarjysy túrik jáne káris serıaldaryn túsirýge ketip jatyr. Sondyqtan bıyldan bastap ol telehıkaıalardy satyp alý jumysy toqtatyldy. Sol aqsha otandyq teleónimderdi shyǵarýǵa jumsalmaq», - deıdi M.Qul-Muhammed. Osy oraıda mınıstr «Qasym» teleserıalyn erekshe atap ótti. Búginde ony shet memleketter de satyp alyp jatyr. Atalǵan telehıkaıanyń jalǵasyn túsirý kózdelgen. Budan basqa, dańqty qolbasshy, halyq qaharmany Baýyrjan Momyshuly men áıgili opera ánshisi Kúlásh Baıseıitova týraly teleserıaldar da túsirilip jatyr.