Memlekettiń koronavırýspen kúres sharalary halyq jaýapkershiligimen ushtasýy qajet – Sarapshy pikiri

NUR-SULTAN. QazAqparat – Memleket tarapynan jasalǵan koronavırýspen kúres sharalary halyqtyń jaýapkershiligimen ushtasýy qajet. Bul pikirdi QR Prezıdenti janyndaǵy Qazaqstan strategııalyq zertteýler ınstıtýty Halyqaralyq zertteýler bóliminiń basshysy Ásel Nazarbetova bildirdi, dep habarlaıdy QazAqparat tilshisi.

«QR Prezıdenti Qasym-Jomart Toqaev eldegi pandemııaǵa baılanysty oryn alǵan kúrdeli epıdemıologııalyq jaǵdaıǵa oraı halyqqa úndeý jarııalady. Bul jalpy álem boıynsha koronavırýs taraýynyń báseńdemeı otyrýyna da tikeleı baılanysty qalyptasqan úrdis. Mamandardyń boljaýynsha jahandyq indetke aınalǵan Covid-19 sharyqtaý shegine áli jetken joq. Keıbir elderde qaıta órshý oryn alyp otyr. Sońǵy statıstıkaǵa júginsek, álem boıynsha vırýsqa shaldyqqandar sany 12 mln adamǵa jetip, qaıtys bolǵandar sany 540 myńnan asty», - deıdi sarapshy.

Qazaqstanda da koronavırýs boıynsha statıstıka kúnnen kúnge ulǵaıyp, qoǵamnyń jáne halyqtyń zor alańdaýshylyǵyn týdyryp otyr. Ár otbasynda osy indet saldarynan qaıǵyǵa dýshar bolyp, jaqyndarynan aıyrylý faktileri tirkelýde. Osy oraıda Memleket Basshysynyń sheshimimen 13 shilde – Ulttyq aza tutý kúni bolyp jarııalandy.

«Bul óte oryndy sheshim dep qabyldaımyz. Qaza bolǵandardyń ishinde elimizge eńbegi sińgen qaıratkerler, asyl azamattarymyz da bar. Solardyń esimin tizip, jadymyzda máńgi ustaıyq degen qoǵamdyq usynystar da quptarlyq. Elimizdegi Covid-19 indetimen kúresý sharalary barysynda jiberilgen kemshilikterdiń bolǵanyn, odan tıisti qorytyndylar shyǵarylatynyn Prezıdent jasyrmaı, alapat indetpen kúrestiń jalǵasa beretinin nyq senimmen aıtty. Memleket tarapynan jasalǵan indetpen kúres sharalary halyqtyń asqan jaýapkershiligimen ushtasýy qajet ekenin sońǵy aılardaǵy tájirıbe anyq ańǵartyp otyr. Jaǵdaıdyń ýshyǵýyna sebep bolǵan tek tıisti memlekettik organdar tarapynan jiberilgen qatelikter ǵana emes, halyq tarapynan bul máselege nemquraıly qarap, bılikke degen senimsizdik bildirýiniń saldary. Oǵan qosa ulttyq mentalıtetke tán ujymdyq psıhologııa, týǵan-týysynyń qýanyshy men qaıǵysyna mindetti túrde ortaqtasý dál osy jaǵdaıda elimizge keri áserin berip otyr», - dedi QSZI ókili.

Qazirgi ýaqytta Memleket basshysynyń tikeleı baqylaýymen jaǵdaıdy turaqtandyrý, dári-dármekpen ýaqtyly qamtamasyz etý, jedel medıtsınalyq kómek berý, qosymsha aýrýhanalarda oryndar daıyndaý sııaqty túrli sharalar qarqynmen júrgizilýde.

«Buqaralyq aqparat quraldarynda berilip jatqan halyqqa túsindirý jumystary da tıisti deńgeıde. Degenmen bul indetpen kúresý ár adamnyń jeke jaýapkershiligine, jaqyndaryna, aınalasyndaǵylarǵa qamqorlyǵyna, eldiń qaıǵysynan paıda kórý úshin emes, kerisinshe alǵysyn alýǵa umtylýyna tikeleı baılanysty», - dedi Ásel Nazarbaetova.