Memlekettiń qazirgi tańdaǵy basty maqsaty - naýqastar sanyn azaıtý – QSZI sarapshysy

NUR-SULTAN. QazAqparat – Áleýmettik-saıası zertteý bóliminiń ǵylymı qyzmetkeri Aıdana Akesına karantındi uzartý týraly bıliktiń sheshimine qatysty pikir bildirdi, dep habarlaıdy QazAqparat tilshisi.

«Óńirler arasyndaǵy avtobýs qatynasyn toqtatý, qalalardaǵy qoǵamdyq kólikterdiń jumysyn shekteý, buqaralyq is-sharalardy ótkizýge tyıym salý, jabyq bazarlardyń, sulýlyq salondarynyń, kınoteatrlardyń, dinı nysandardyń qyzmetin toqtatý sekildi engizilgen shekteýlerdiń arqasynda búginde statsıonarlardyń jumysy 43 paıyzǵa, reanımatsııalyq palatalardyń jumysy 27 paıyzǵa, sondaı-aq jedel járdem shaqyrtýshylardyń sany azaıǵany belgili boldy», - dedi Aıdana Akesına.

Onyń aıtýynsha, jekelegen jerlerde adamdardyń toptasyp júrýi, mádenı baılanystyń joǵary deńgeıi sııaqty áleýmettik faktorlar bizdiń qoǵam úshin qosymsha qaýipter týǵyzady.

«Sondyqtan 3 tamyzdan bastap qatań karantındi uzartý, eń aldymen, engizilgen shekteýlerdiń oń áserin «nyǵaıtýǵa» jáne bolashaqta aýrýdyń qaıtadan ósýine daıyn bolý úshin qajet. Osy ýaqyt ishinde óńirlerde dárilik zattarmen qamtamasyz etý úshin turaqtandyrý qorlary quryldy, al statsıonarlarda Covid-19 emdeýge arnalǵan dárilerdiń bir aılyq qory quryldy. Qazirgi ýaqytta memleketimiz vırýstyń kóbeıý deńgeıin jáne densaýlyq saqtaý júıesiniń jumysyn azaıtý máselesine basymdyq berip otyr. Bul aýrýhanaǵa shuǵyl jatqyzýdy qajet etetin árbir naýqasqa ýaqytyly medıtsınalyq kómek kórsetýge múmkindik beredi», - dep atap ótti sarapshy.

Ol buǵan deıin sanıtarlyq-epıdemıologııalyq jaǵdaıdy turaqtandyrýdyń oń qarqyny baıqalǵan elderge, mysaly Germanııa, Ispanııa, Qytaı jáne basqa da elderge vırýstyq ınfektsııanyń qaıta órship jatqanyn atap ótti.

«Bul vırýstyń esh jerde múldem joǵalyp ketpeıtinin taǵy bir ret eske salady. Tek úkimet engizgen shekteý sharalary men azamattardyń ózin-ózi tárbıeleýiniń arqasynda aýrýdyń taralý deńgeıi baıaýlaıdy. Kún saıyn adamzat Covid-19 vırýsymen aýyrǵandardyń aýrýynyń asqynýy túrindegi onyń jańa qysqa merzimdi jáne uzaq merzimdi saldary týraly biledi. Bul onyń popýlıatsııa úshin qaýiptiligin jaýapkershilikpen qabyldaý qajet ekenin taǵy bir ret rastaıdy»,- dep túıindedi A. Akesına.

Avtor: Azamat Syzdykbaev