Memlekettiń energetıkalyq, sý jáne tranzıttik áleýeti eldiń ekonomıkasyn damytýǵa jumys isteýi tıis - B.Saparbaev

ASTANA.QazAqparat - Memlekettiń energetıkalyq, sý jáne tranzıttik áleýeti eldiń ekonomıkasyn damytýǵa, halqynyń turmysyn jaqsartýǵa jumys isteýi tıis. Bul týraly búgin VIII Astana ekonomıkalyq forýmynyń «Eýrazııalyq energetıkalyq, sý jáne tranzıttik áleýetiniń turaqty damýy» atty sessııasynda QR Premer-Mınıstriniń orynbasary Berdibek Saparbaev aıtty.

«Energetıka baı memlekettiń turaqty damýy sol energetıkalyq resýrstardy tıimdi paılanyp, ıgerýine tikeleı balanysty. Al memlekettiń energetıkalyq, sý jáne tranzıttik áleýeti de eldiń ekonomıkasyn damytýǵa, halqynyń turmysyn jaqsartýǵa jumys isteýi tıis», - dedi ol.

B.Saparbaevtyń aıtýynsha, energetıkalyq resýrstardy neǵurlym kóbirek óndiretin bolsaq, soǵan sáıkes aýa, klımat ózgeriske ushyraıdy. Sondyqtan ekologııany jaqsartý úshin tıisti is-sharalar qoldaný qajet.

«Ózderińizge belgili, 8 jyl buryn BUU Assambleıasynda bizdiń Memleket basshymyz N.Nazarbaev energetıkalyq-ekologııalyq strategııany qabyldaý týraly usynys jasady. Ol usynys BUU tarapynan qabyldanyp, qazirgi tańda tek Qazaqstanda ǵana emes, dúnıe júzinde osy strategııa júzege asýda», - dedi Úkimet basshysynyń orynbasary.