Memlekettiń baǵaly qaǵazdary boıynsha álemdik júıe arqyly esep aıyrysýǵa bolady
«QR Ulttyq banki Clearstream-men birlesip Qazaqstan Respýblıkasynyń memlekettik baǵaly qaǵazdaryn Clearstream júıesinde esepteletin baǵaly qaǵazdar tizimine qosý boıynsha jobany iske asyrýda. Qazirgi kezeńde baılanys kanalyn qazaqstandyq naryqpen qosý boıynsha sońǵy sharalar júrgizilýde. Jobany 2018 jyldyń shilde aıynda qosý josparlanýda», - delingen UB habarlamasynda.
Birlesken jobanyń iske qosylýy qazaqstandyq zańnama aıasynda teńgemen shyǵarylǵan barlyq memlekettik baǵaly qaǵazdar boıynsha Clearstream halyqaralyq júıesi arqyly esep aıyrysýǵa múmkindik beredi. Sondaı-aq sheteldik ınvestorlardyń qazaqstandyq qor naryǵyna qoljetimdiligin keńeıtedi. Júıeniń iske qosylýy sonymen qatar sheteldik ınvestorlardyń Qazaqstannyń memlekettik oblıgatsııalaryna suranysty arttyryp, olardyń syrtqy naryqtaǵy tartymdylyǵyna oń áserin tıgizedi.
Jalpy bul joba jergilikti naryqtyń ınfraqurylymyn damytýǵa, onyń álemdik ınvestıtsııalyq ortada tanylýyna arnalǵan. Qazaqstandyq naryqqa ınvestorlardy tartýdyń sátti joldarynyń biri otandyq naryq múmkindikterin sapaly jarnamalaý bolyp tabylady. Bul baǵyttaǵy alǵashqy qadamdar 2018 jyldyń 18-19 sáýiri aralyǵynda Londonda ótken konferentsııada jasaldy. Onda QR Ulttyq banki men «Qazaqstandyq qor naryǵy» AQ otandyq naryqtyń tanystyrylymyn jasady.
Al ústimizdegi maýsym aıynyń 27-si kúni Ulttyq bank Blýmberg pen Clearstream kompanııalarymen birlesip London qalasynda sheteldik ıtnvestorlar úshin «Investment opportunities in Kazakhstan» arnaıy konferentsııa ótkizbek. Ol jańa jeliniń iske qosylýyna arnalatyn bolady.