Memlekettiń áleýmettik tólemi otbasyma úlken kómek boldy - kókshetaýlyq turǵyn

NUR-SULTAN. QazAqparat - Kókshetaý qalasynda turatyn Ásem Álıeva memleket tarapynan berilgen 42 500 teńge mólsherindegi áleýmettik tólem otbasy úshin úlken kómek bolǵanyn aıtty, dep habarlaıdy QazAqparat tilshisi.

«Elimizde karantın rejıminiń jarııalanýyna baılanysty beriletin 42 500 teńge mólsherindegi áleýmettik tólemdi keshe aldym. Bul qarajat qazirgi ýaqytta otbasym úshin úlken kómek boldy. Kıim-keshek satatyn dúkende satýshy bolyp jumys isteımin jáne karantınge baılanysty jumysymyz toqtap tur. Sondyqtan eńbek demalysyndamyz. Biraq, eńbek demalysy ýaqytynyń aıaqtalýyna baılanysty endi aqysyz demalystamyz desek te bolady. Mine, osyndaı kezde memleket tarapynan berilgen kómek úlken demeý jáne otbasymyzǵa bir aılyq azyq-túlik alýǵa jetkilikti», - dedi ol.

Ásem joldasymen 2 balany tárbıelep otyr. Ózderiniń jeke páterleri joq. Sondyqtan ony jaldaýǵa májbúr.

«Joldasym qaladaǵy fırmalardyń birinde montajdaýshy bolyp jumys isteıdi. Alaıda, onyń tabysy jaldap turyp jatqan páterimizdiń aqysyna, kommýnaldyq tólem jasaýǵa ketedi», - dedi Ásem Álıeva.