Memlekettiń 12 mlrd teńge qarjysyna qaıta jóndelgen Aqsý qant zaýyty toqtap tur

TALDYQORǴAN. QazAqparat - Jetisý oblysyndaǵy 12 mlrd teńgege qaıta jańǵyrǵan Aqsý qant zaýyty toqtap tur. Nysannyń jumysyn óńir basshysy Beıbit Isabaev synǵa aldy, dep habarlaıdy QazAqparat tilshisi.

«Aqsý qant zaýytyna 12 mlrd teńge bıýdjettik ınvestıtsııalar túrinde memlekettik qoldaý kórsetilgenine qaramastan, zaýyt toqtap tur. Sonyń saldarynan osy jazda qant tapshylyǵy oryn alyp, baǵasy kúrt ósti. Zaýyt mańyndaǵy qant qyzylshasyn ósirgen fermerler ony 150 shaqyrym jerdegi Kóksý qant zaýytyna tasymaldaýǵa májbúr. Osyǵan baılanysty Memleket basshysy qysqa merzimde zaýytty iske qosýdy nemese jańa ınvestorlar tartý múmkindigin qarastyrýdy tapsyrdy. Sonymen qatar, bizge oblystaǵy eki qant zaýytynyń júz paıyz júktemesin qamtamasyz etip, onda shyǵarylatyn aq qant kólemin 2026 jylǵa deıin 180 myń tonnaǵa deıin jetkizý kerek», - dedi Beıbit Isabaev.

Bul rette memleket tarapynan qyzylsha ósirýshilerge kórsetilip otyrǵan qoldaýlar jaıly aıtty. Degenmen Aqsý aýdanynda 565 ga qyzylsha sebilip, onyń 500 gektarynan nebári 4,1 myń tonna qyzylsha zaýytqa ótkizilgen, ónimdiligi 88 tsentnerdi quraǵan.

Aýdan ákimdigine bul máseleni túbegeıli zerdelep, kemshilikterdi qaıtalamas úshin kelesi jyldyń qant qyzylshasynyń alqaptaryn ulǵaıtyp, tehnologııa talaptaryn saqtap, gektar ónimdiligin arttyrý baǵytynda sharýashylyqtarmen pármendi jumys júrgizýdiń naqty josparyn jasaý tapsyryldy.

Esterińizge sala keteıik, 10 jyl boıy toqtap turǵan Aqsý qant zaýyty 2017 jyly 25 qyrkúıekte iske qosylǵan bolatyn.