Memlekettik josparlaý júıesi: Ulttyq jobalar qalaı baǵalanady jáne kelisiledi

NUR-SULTAN. QazAqparat – QR Strategııalyq josparlaý jáne reformalar jónindegi agenttiktiń tóraǵasy Qaırat Kelimbetov Memlekettik josparlaý júıesi aıasynda ulttyq jobalar qalaı baǵalanatyndyǵyn aıtty, dep habarlaıdy QazAqparat tilshisi.

«Árbir joba ázirleý barysynda Ulttyq ekonomıka mınıstrligi tarapynan ekonomıkalyq negizdiligine, Qarjy mınıstrligi tarapynan qarjy resýrstarymen qamtamasyz etilýine, Strategııalyq josparlaý jáne reformalar agenttigi tarapynan memlekettik josparlaý júıesiniń joǵarǵy qujattaryna sáıkestigine baǵalanady», - dedi Qaırat Kelimbetov Aqordada Memleket basshysynyń tóraǵalyǵymen ótken Reformalar jónindegi joǵarǵy keńes otyrysynda.

Agenttik basshysynyń atap ótýinshe, odan ary joba Qazaqstan Respýblıkasy Úkimetmen kelisilgennen keıin QR Prezıdenti Ákimshiliginiń qaraýyna jáne QR Prezıdenti janyndaǵy Joǵarǵy keńestiń maquldaýyna ári bekitýne engiziletin bolady. Ulttyq joba joǵaryda atalǵan kelisýdiń barlyq kezeńinen ótkennen keıin Úkimet qaýlysymen zańdy túrde bekitiledi.

«Buǵan qosa, jobalar el Parlamentiniń depýtattyq korpýsymen de talqylanýy tıis. Bul bıýdjettik protsester aıasyndaǵy ózara is-qımyldy úılestirýdi qamtamasyz etýge múmkindik beredi», - dedi Qaırat Kelimbetov.